अकोला : अकोला शहरात ज्याप्रमाणे पॉझिटिव्ह रुग्णांची संख्या झपाट्याने वाढत आहे अगदी त्याच प्रमाणे या पॉझिटिव्ह रुग्णांमधील काही जणांचा मृत्यूदेखील होता आहे. आतापर्यंत दहा जणांचा मृत्यू झाला असून, एका जणाने आत्महत्या केली आहे. अशातच या दहा पैकी बुधवारी एकाच दिवशी चार जणांच्या मृत्यूची नोंद करण्यात आली आहे. ही बाब अकोलेकरांसाठी चिंतेसह चिंतन करण्याची आहे.

कोविड-19 आजाराने गत 24 तासात शहरातील विविध भागातील चार रुग्णांचा मृत्यू झाल्याचे जिल्हा प्रशासनाकडून बुधवारी सायंकाळी सांगण्यात आले. नोंदविल्या गेलेल्या मृतकांमध्ये दोन महिला या बैदपुरा भागातील, एक व्यक्ती दाना बाजार भागातील, तर एक जण खंगनपुरा भागातील आहे. यापैकी तीघांचा मृत्यू मंगळवारी झाला असून, त्यांचे अहवाल पॉझिटिव्ह असल्याचे आज स्पष्ट झाले. 

महत्त्वाची बातमी - अकोल्यात पॉझिटिव्ह रुग्णांची ‘साठी’ पार

तर खंगनपुरा भागातील 65 वर्षीय पुरुषाचा मृत्यू बुधवारी सकाळी 8 वाजताचे दरम्यान शासकीय वैद्यकीय महाविद्यालयातील आयसोलेशन कक्षात उपचार सुरु असताना झाल्याचे जिल्हा प्रशासनाने स्पष्ट केले आहे. दरम्यान, बुधवारी एकून 100 अहवाल प्राप्त झाले असून, त्यापैकी सात जणांचे अहवाल पॉझिटिव्ह, तर 93 जणांचे अहवाल निगेटिव्ह आल्याचे सांगण्यात आले आहे. आज सकाळी पॉझिटिव्ह आलेल्यांमध्ये एक महिला रुग्ण राधाकिसन प्लॉट, तर एक ताजनगर मधील आहे. 

हेही वाचा - माजी गृहराज्यमंत्र्यांची कन्या पुण्यात देतेय कोरोनाविरुद्ध लढा; फ्रंट लाईन वॉरियर म्हणून अविरत सेवा

तर सायंकाळच्या अहवालात पॉझिटिव्ह आलेले दोन रुग्ण ज्यात एक सहा वर्षिय बालिका व 20 वर्षीय युवतीचा समावेश आहे. या दोघी अनुक्रमे मेहर नगर व ताजनगर भागातील आहेत. दरम्यान, कोविड आजाराने आतापर्यंत दहा जणांचा मृत्यू झाला असून, एका कोरोनाबाधिताने आत्महत्या केली आहे. जिल्ह्यात आतापर्यंत 11 कोरोनाबाधितांच्या मृत्यूची नोंद जिल्हा प्रशासनाकडे आहे.