नागपूर : भाजयुमोचा युवा कार्यकर्ता जितू बडे हत्याकांडानंतर उदयनगरात तणावपूर्ण शांतता निर्माण झाली आहे. त्यामुळे हुडकेश्‍वर पोलिसांनी परिसरात तगडा बंदोबस्त ठेवून परिस्थिती नियंत्रणात ठेवली आहे. या हत्याकांडात मुख्य आरोपी प्रसाद रोकडेसह पाच आरोपींना हुडकेश्‍वर पोलिसांनी अटक केली. आज पोलिसांनी आरोपींना न्यायालयात हजर केले. न्यायालयाने आरोपींना चार दिवस (ता. 2) पोलिस कोठडीत ठेवण्याचे आदेश दिले आहे. 

पोलिसांनी दिलेल्या माहितीनुसार, भारतीय जनता युवा मोर्चाचा कार्यकर्ता जितू वासुदेवराव बडे (वय 29, संजय गांधीनगर) याचा आणि अन्य गटातील प्रसाद रोकडे याचा पैशाचा वाद होता. तसेच एका शुभेच्छांचे पोस्टर फाडल्यावरून संघर्ष सुरू होता. रविवारी मध्यरात्री जितू बडे हा मित्र रितीक डेंगे आणि अभिजित खरात यांच्यासोबत उदयनगर चौकात उभे होते. त्यांनी पोस्टर फोडल्याची माहिती मिळताच प्रसाद रोकडे व त्याचे साथीदार सुमित दहने, रोहन राऊत, अभिषेक डोईफोडे आणि अनिमेश तागडे आणि अन्य दोन युवकांसह तो दुचाकीने उदयनगर चौकात पोहोचला. जितू आणि प्रसाद यांच्यात चांगलीच बाचाबाची झाली. प्रसादने टोळीच्या मदतीने भरचौकात जितूचा चाकूने भोसकून खून केला. या हत्याकांडानंतर युवा वर्ग मोठ्या प्रमाणात गोळा झाला. या हत्याकांडाला राजकीय रंग देण्याचाही प्रयत्न झाला. या प्रकरणी हुडकेश्‍वर पोलिसांनी सोमवारी सायंकाळी प्रसाद रोकडेला अटक केली होती तर अन्य चौघांना रात्री उशिरा अटक केली होती. तर अर्चित नरेश भावे (वय 23, रा. पुनापूर रोड, पारडी) याला कामठीतून परिमंडळ पाचच्या पथकाने अटक केली. 

गटात संघर्ष पेटण्याची शक्‍यता 
जितू बडे हत्याकांडानंतर हुडकेवरमध्ये दोन गट आक्रमक झाले आहेत. त्यामुळे दोन्ही गटांत येत्या काळात संघर्ष पेटण्याची चिन्हे आहेत. आरोपींची संख्या सध्या सहापर्यंत पोहोचली असून, या हत्याकांडात आरोपींची संख्या आणखी वाढणार आहे. हुडकेश्‍वर पोलिस अन्य आरोपींचा शोध घेत आहेत. 

आरोपींचा सीडीआर निघणार 
जितू बडे हा मामेभाऊ गोलू खरातसोबत गप्पा करीत अंगणात बसला होता. त्याला कुणीतरी फोन करून उदयनगर चौकात बोलावले. त्याला बोलविण्यापूर्वीच "गेम' करण्याची प्लानिंग झाली होती. उदयनगरात आल्यानंतर वाद घालून जितूचा मामेभावासमोरच खून करण्यात आला.