अमरावती ः शहरातील व्यापारी कुटुंबातील चार वर्षीय चिमुकल्याचे अपहरण करणारे वीस तासांनंतरही सापडले नाहीत. परंतु अपहरणकर्ते पोलिसांच्या रडारवर असल्याचा दावा पोलिसांनी केला. लहान मुलाचे अपहरण कशासाठी केल्या गेले, ही बाब अद्यापही गुलदस्त्यातच आहे.

चिमुकल्याच्या अपहरणाच्या घटनेमुळे रात्रभर पोलिसांनी अनेक ठिकाणी झडती घेतली. पहाटेपासून पुन्हा शोधकार्य सुरू झाले. नयन लुणीया (वय चार वर्षे, रा. शारदानगर), असे अपहरण झालेल्या मुलाचे नाव आहे. बुधवारी (ता. 17) रात्री आठच्या सुमारास नयन हा त्याच्या आजीसोबत रस्त्याने फिरत होता. एका शाळेपासून काही फूट अंतरावर एक दुचाकी थांबली, त्यावर युवक व युवती असे दोघे होते. युवक त्या मुलाजवळ आला आणि आवाज देऊन त्याला उचलले. त्यानंतर महिलेसह दुचाकीवरून पसार झाले. 

हेही वाचा  - भंडारा जिल्हा रुग्णालय दुर्घटना : दोन...

आपल्या लहान भावाला कुणीतरी उचलून नेत असल्याचे छोट्या बहिणीने बघितले. ती ओरडल्यानंतर कुटुंबातील सदस्यांनी धाव घेतली. परंतु तोपर्यंत शारदानगर परिसरातून अपहरणकर्ते चिमुकल्याला घेऊन पसार झाले. युवक-युवतीने दुचाकीवर बसवून नयनला रवीनगर येथील श्रीमाळी प्लाझा या व्यापारसंकुलापर्यंत आणले. येथून एका ऑटोत बसून मुलासह निघून गेले. 

त्यांनी दुचाकी रवीनगरातच उभी केली होती. येथील सीसीटीव्ही फुटेजमध्ये तसे बघायला मिळते. परंतु ऑटोचा आणि दुचाकीचा क्रमांक कुठल्याही कॅमेऱ्यात स्पष्ट दिसत नाही. रात्रभर पोलिसांनी श्री. लुणीया यांच्या एमआयडीसीमधील कारखान्यात काम करणाऱ्या कामगारांची चौकशी केली. शारदानगर ते रवीनगरपर्यंत वीस ते पंचवीस ठिकाणांचे सीसीटीव्ही फुटेज तपासले. परंतु वीस तासांनंतरही पोलिसांना ठोस निष्कर्षापर्यंत पोहोचता आले नाही. दरम्यान, उपायुक्त शशिकांत सातव यांनी शारदानगर येथील श्री. लुणीया यांच्या निवासस्थानी भेट दिली. कुटुंबातील सदस्यांची त्यांनी तब्बल दोन तास चौकशी केली.

अपहरण कशासाठी?

लुणीया कुटुंबाची माहिती ठेवणाऱ्याने चिमुकल्याचे अपहरण केल्याची शक्‍यता वर्तविण्यात आली. परंतु दुसऱ्या दिवशीही खंडणीसाठी कुणाचाही कुटुंबातील सदस्यांना फोन आला नाही. त्यामुळे अपहरण कशासाठी? हा प्रश्‍न अनुत्तरित आहे.

हेही वाचा - नागरिकांनो! अंत्यसंस्कारासाठी २०, तर लग्नात फक्त ५० जणांना परवानगी

चिमुकल्याच्या अपहरणाचे कारण अद्याप पुढे आले नाही. परंतु घटना घडली तेव्हाची स्थिती बघता ओळखीतील व्यक्ती यात सहभागी असण्याची शक्‍यता पोलिसांनी व्यक्त केली. विविध टप्प्यांत चौकशी सुरू आहे. चिमुकल्या नयन लुणीयाच्या शोधासाठी पोलिस पथक विविध ठिकाणी रवाना झालेले आहेत.
-डॉ. आरती सिंह, 
पोलिस आयुक्त, अमरावती.

संपादन - अथर्व महांकाळ