मंगरूळ चव्हाळा (जि. अमरावती) : नांदगावखंडेश्‍वर तालुक्‍यातील मंगरूळ चव्हाळा ठाण्याच्या हद्दीत पिंपळगाव बैनाई गावात उधारीच्या पैशासाठी सारखा तगादा लावणाऱ्या व्यक्तीचा रविवारी (ता. एक) खून करण्यात आला. धनराज मोतीराम लाहे (वय ४०, रा. पिंपळगाव बैनाइ) असे मृत व्यक्तीचे नाव आहे. सकाळी आठ वाजताच्या सुमारास ही घटना घडली.

गावातील घनश्‍याम विठ्ठल डांगे याने धनराज लाहेकडून सात हजार रुपये उधार घेतले होते. त्यामुळे लाहे वारंवार पैशाची मागणी करीत होते. रविवारी सकाळी बोरगाव, पिंपळगाव मार्गावरील लाहे यांच्या शेतात डांगे हे पत्नीसह आधीच तळ ठोकून होता. लाहे येताच डांगे याने त्यांच्यावर धारदार शस्त्राने हल्ला केला.

अधिक वाचा - कांदा, बटाटा तडकला; लाभ व्यापाऱ्यांना; शेतकऱ्यांचे माप रितेच

त्यात गंभीर जखमी धनराज लाहे यांचा मृत्यू झाला. मृत व्यक्तीचा भाऊ रवींद्र लाहे यांच्या तक्रारीवरून मंगरूळचव्हाळा पोलिसांनी घनश्‍याम डांगे व पत्नी वेणूविरुद्ध खुनाचा गुन्हा दाखल केला आहे. डांगे दाम्पत्यास तातडीने अटक करण्यात आल्याचे मंगरुळ चव्हाळा पोलिसांनी सांगितले.

अपघातात दुचाकीस्वार ठार

परतवाडा ते शिरसगाव मार्गावर शनिवारी (ता. ३१) रात्री झालेल्या अपघातात दुचाकीस्वाराचा मृत्यू झाला, तर दुसरा गंभीर जखमी आहे. पराग बाळासाहेब साळकर (वय ३५) असे मृत दुचाकीस्वाराचे नाव आहे. भालेवाडी गावाजवळ दुचाकी खड्ड्यातून उसळून अनियंत्रित झाल्यामुळे रस्त्याच्या पंधरा फूट अंतरावर पडली. त्यात साळकर गंभीर जखमी झाल्याने त्याचा जागीच मृत्यू झाला.

क्लिक करा - टाकू का विहिरीत उडी? असे म्हणताच गेला तोल...

सोबत असलेला मित्र आशीष दिलीप गोरडे हा जखमी झाला. खरपी ते शिरसगाव कसबा गावापर्यंतच्या रस्त्याची अवस्था दयनीय आहे. सार्वजनिक बांधकाम विभागाने दुर्लक्ष केल्यामुळे महामार्गावर जागोजागी खड्डे पडले आहे. साळकर मित्रासोबत परतवाडा येथून परत येत असताना खड्ड्य़ांतून दुचाकी उसळली. जखमी आशिषला अमरावतीत दाखल करण्यात आले आहे.

संपादन - नीलेश डाखोरे