अमरावती : कोरोनाच्या संसर्गामुळे सातत्याने प्रकाशझोतात येत असलेल्या ताजनगरात बुधवारी (ता. 20) रात्री दुसऱ्याच कारणाने चर्चेत आला. येथे क्षुल्लक कारणावरून युवकाचा खून झाल्याने चांगलीच खळबळ उडाली होती. सलमान खान वल्द इस्माईल खान (वय 19 रा. ताजनगर) असे मृत युवकाचे नाव आहे. 

पोलिसांनी दिलेल्या माहितीनुसार, रिजवान मोहंमद इलियास, मोनू उर्फ शोएब खान इब्राहीम हाजी, इमरान, इब्राहीम हाजी, इशाक पहेलवान, साजिद, जावेद रेतीवाला व राजा (सर्व रा. मुजफ्फरपुरा) अशा आठ जणांविरुद्ध पोलिसांनी खुनाचा गुन्हा दाखल केला. त्यापैकी मोहंमद रिझवान व मोनू उर्फ शोएब खान या दोघांना हल्ल्यानंतर रात्रीच नागपुरीगेट पोलिसांनी अटक केली. उर्वरित सहा जण गुरुवारपर्यंत (ता. 21) पसार होते. शेख कालू उर्फ शेख छोटू (वय 37 रा. ताजनगर नं. एक) यांनी पोलिसात तक्रार नोंदविली.

हेही वाचा - अल्पवयीन मुलगी सुट्ट्यांमध्ये मामाकडे राहायला आली अन् गर्भवती झाली; मग कुटुंबीयांनी पुण्यात केली प्रसूती

ताजनगर चौकात पटेल मेडिकल स्टोअरसमोर ही घटना घडली. याठिकाणी घटनेच्या एक तासांपूर्वी शेख कालू याने मारेकऱ्यांपैकी काही जणांचा हटकले होते. त्यावेळी त्यांच्यात शाब्दिक चकमक उडाली होती. त्यानंतर काही वेळात सात ते आठ जणांनी तलवार, चाकू, काठ्यांसह ताजनगर येथील मेडिकल स्टोअरसमोर धाव घेतली. यानंतर शेख कालू व त्याच्या मित्रांसोबत वाद घातला. 

वाद वाढत असल्यामुळे शेजारी उभा सलमान खान वाद मिटवण्यासाठी मध्यस्थी करण्यासाठी गेला. त्यामुळे चिडलेल्या आठ जणांनी सलमान खान याच्याशी वाद घालून त्याला मारहाण केली. एकाने चाकूने छातीत वार केला. त्यात गंभीर जखमी सलमानला उपचारासाठी जिल्हा सामान्य रुग्णालयात दाखल करण्यात आले. परंतु, उपचारादरम्यान त्याचा मृत्यू झाला. त्यामुळे इर्विन रुग्णालयासह ताजनगरात मोठा जमाव जमल्याने पोलिसांची अतिरिक्त कुमक तैनात करण्यात आली. काही वेळाने तणाव निवळला.

अधिक माहितीसाठी - पत्नी बनली रणचंडिका; पतीच्या प्रेयसीला धु..धु धुतले... वाचा काय झाले ते

जुनी पार्श्‍वभूमी नाही 
क्षुल्लक वादातून खुनाची घटना घडली. त्याला जुनी पार्श्‍वभूमी नाही. पसार हल्लेखोरांना शोधण्याचे प्रयत्न सुरू आहेत. 
- अर्जुन ठोसरे, 
पोलिस निरीक्षक, नागपुरीगेट ठाणे.