नागपूर : ग्राहकाला बनावट घड्याळ विकणे ॲमेझॉन कंपनीच्या (Amazon Company) चांगलेच अंगलट आले. या प्रकरणात मुख्य न्याय दंडाधिकारी न्यायालयाने कळमना पोलिस ठाण्याला (Kalamna Police Station) ॲमेझॉन कंपनीविरोधात फसवणुकीचा गुन्हा दाखल करण्याचे आदेश दिले.

परमजितसिंग कलसी यांनी कंपनीविरोधात न्यायालयात धाव घेतली. मुख्य न्यायदंडाधिकारी एस. टी. दंडे यांनी या प्रकरणी निर्णय दिला. अर्जानुसार, कलसी यांनी ब्रँडेड कंपनीचे घड्याळ (Branded Watch) विकत घेण्यासाठी इंटरनेटवर शोधाशोध केली.

त्यांना आवडलेले १ हजार ८९८ रुपयांचे घड्याळ ॲमेझॉन कंपनीच्या वेबसाइटवर उपलब्ध दिसले. त्यावेळी स्विझरलँड येथील ब्रँडेड रेडो कंपनीच्या त्या घडाळ्याचे सुंदर-सुंदर फोटोसुद्धा त्यांना पाहायला मिळाले. कलसी यांच्याकडे ॲमेझॉनचे वार्षिक सबस्क्रीप्शन असल्याने १९ डिसेंबर २०२१ रोजी ऑनलाइन पैसे जमा करीत त्यांनी ते घड्याळ ऑर्डर केले.

दिल्ली येथील एम के मार्केटिंगने ती ऑर्डर स्वीकारली. लागलीच २३ तारखेला त्यांना हे घड्याळ प्राप्त झाले. घड्याळ घेतल्याच्या उत्साहात मुलांनी व्हिडिओ रेकॉर्डिंग करीत ते पॅकेट उघडले. मात्र, ब्रँडेड ऐवजी सर्वसाधारण घड्याळ मिळाल्याने कलसी कुटुंबीयांच्या उत्साहावर पाणी फेरले गेले. फसवणूक झाल्याचे लक्षात येताच त्यांनी कळमना पोलिस ठाण्यात धाव घेतली.

परंतु, पोलिसांनी कुठलाही गुन्हा दाखल न केल्याने कलसी यांनी ॲमेझॉन आणि विक्रेत्या विरोधात न्यायालयात अर्ज दाखल केला. न्यायालयाने ॲमेझॉन कंपनीवर गुन्हा दाखल करण्याचे आदेश दिले. तसेच, कळमना पोलिसांनी तपास करीत नियमानुसार अहवाल सादर करावा, असेही नमूद केले. कलसी यांच्यातर्फे ॲड. ए. एस. तिवारी यांनी बाजू मांडली.

लाखभराचे घड्याळ काही हजारात

सामान्यपणे कलसी यांनी ऑर्डर केलेल्या घड्याळाची किंमत एक लाख रुपयांच्या वर आहे. मात्र, ॲमेझॉनने याच घड्याळाचे चांगले चांगले फोटो दाखवत ते स्वस्त किमतीत देण्याचे कलसी यांना आमिष दिले, असा त्यांचा आरोप आहे. शिवाय, घड्याळ ब्रँडेड असूनही त्या कंपनीचे वॉरंटी कार्डदेखील सोबत मिळाले नाही. मनस्ताप सहन करावा लागल्याने कलसी यांनी न्यायालयात धाव घेतली.