नागपूर : जेथे सर्व आशा मावळतात, तेथे मात्र डॉक्‍टरांना (doctor's day 2021) देवदूताची उपमा दिली जाते. कोरोनाकाळात (coronavirus) हेच देव देव्हाऱ्यात नाही, तर रुग्णालयात पीपीई किटमध्ये कोरोनाशी लढताना दिसत होते. जीव वाचल्यानंतर डॉक्टरांच्या आभारासाठी जोडलेले हात त्यांचे देवपण नाकारत त्यांच्यावर वार करण्यास उठले. अशावेळी या देवदूतांच्या वेदनांशी कधी नाते जोडणारे? या देवमाणसांच्या मानसिक अवस्थांचे सकारात्मक ऑडिट हा समाज कधी करेल, असे प्रश्न निर्माण होत आहेत. (doctors day 2021 doctors also need of counseling in corona time)

शेवटच्या घटका मोजणाऱ्यांना जीवदान देणाऱ्या या माणसातील देवदूताबद्दल समाजात गैरसमज निर्माण झाले आहेत. आज ‘डॉक्टर डे’च्या पार्श्वभूमीवर काही निवडक डॉक्टरांशी चर्चा केली. महाराष्ट्र मेडिकल सर्व्हिसेस कायद्यांतर्गत डॉक्टरांवर हल्ला करणाऱ्यांना शिक्षा होते. तरीदेखील राज्यात कोविड काळात मार्च २०२० पासून आतापर्यंत ६९ डॉक्टरांसह आरोग्य कर्मचाऱ्यांवर हल्ले झाले. जीवनदान देणारे डॉक्टर या घटनांचे बळी ठरतात. नाव न सांगण्याच्या अटीवर एका मानसोपचारतज्ज्ञाने सात डॉक्टरांचे समुपदेशन करीत असल्याची माहिती दिली.