Nagpur Accident: नागपूरात भीषण अपघाताची घटना समोर आली आहे. नागपूरच्या मानकापूर परिसरामध्ये भरधाव जाणाऱ्या ट्रकने 12 गाड्यांना जोरदार धडक दिली. यामध्ये 9 कार, एक रुग्णवाहिका आणि दोन दुचाकी वाहनांचा समावेश आहे. या भीषण अपघातामध्ये एकूण चार जण जखमी झाले असल्याची माहिती नागपूर पोलिसांनी दिली आहे.

नागपूरातील मानकापूर चौकामध्ये हा भीषण अपघात झाला आहे. यामध्ये 12 ते 13 चार चाकी गाड्यांचं मोठ्या प्रमाणावर नुकसान झालं आहे. उड्डाण पुलावरून भरधाव वेगात येणाऱ्या ट्रकने सिग्नलवर उभ्या असलेल्या चारचाकी वाहनांना जोरदार धडक दिली. या धडकेत सुमारे पाच ते सहापेक्षा जास्त कारचं नुकसान झालं.

अपघातग्रस्त कारमधील प्रवाशांना दुखापत झाली आहे. अपघातग्रस्त प्रवाशांना उपचारासाठी रुग्णालयात दाखल केलं आहे. अपघात इतका भीषण होता की, एक कार दुसऱ्या कारवर चढल्यामुळे कारचा चेंदामेंदा झाला. अपघातामुळे परिसरात नागरिकांची मोठी गर्दी झाली होती. भीषण अपघातानंतर वाहतुकीवरही काही काळ परिणाम झाला होता.

चालकाचे कंटेनरवरील नियंत्रण सुटल्यामुळे तो समोर लाल सिग्नल असल्यामुळे थांबलेल्या वाहनांवर मागून धडकला. या कंटेनरने अगोदर एका कारला धडक दिली. त्यानंतर काही कार, दुचाकी यासोबत फरफटत गेल्या. यामध्ये एक दुचाकी कंटेनरखाली चिरडली गेली. या अपघातात सिग्नलला थांबलेल्या रुग्णवाहिकेचेही मोठे नुकसान झाले आहे.

या अपघातात आतापर्यंत चारजण जखमी झाल्याची माहिती मिळत आहे. माहिती मिळताच तातडीने मानकापूर पोलिसांचे पथक घटनास्थळी दाखल झाले. हा अपघात नेमका कशामुळे झाला, याचा शोध घेतला जात आहे. आतापर्यंत या घटनेत कोणाचाही मृत्यू झाल्याची माहिती नाही.