नागपूर : मागील चोवीस तासांत ९ जणांचा कोरोनाने मृत्यू झाला असून ग्रामीण भागातील ५ जणांचा समावेश आहे. काल, १० मृत्यूची नोंद झालेल्या शहरात आज एका मृत्यूची नोंद करण्यात आली. ग्रामीण भागात गेल्या अनेक महिन्यांतील बळीची संख्या मोठी आहे. जिल्ह्यात नवे ३ हजार ३१० बाधित आढळून आले. गुरुवारच्या तुलनेत आज बाधितांच्या संख्येत ४३९ जणांची भर पडली.

कोरोना बाधित व बळींचा आलेख दररोज कमी अधिक होत आहे. दररोज शहरात बळींची संख्या दिसून आली. परंतु आज गेल्या चोविस तासांत ग्रामीण भागात ५ बळींची नोंद करण्यात आली तर शहरात एकाचा मृत्यू झाला. जिल्ह्याबाहेरील तिघांचा कोरोनाने मृत्यू झाला. अलिकडे ग्रामीण भागात १ किंवा २ सर्वाधिक बळी नोंदविण्यात आले होते. आज प्रथमच पाच बळींची नोंद झाल्याने ग्रामीण भागातील आरोग्य यंत्रणाही हादरली. आतापर्यंत कोरोनामुळे जिल्ह्यात १० हजार २१२ बळींची नोंद करण्यात आली. यात सर्वाधित ५ हजार ९५६ शहरातील असून ग्रामीण भागात २ हजार ६१३ मृत्यूची नोंद करण्यात आली. जिल्ह्यात आज ३ हजार ३१० बाधितांची नोंद करण्यात आली. गुरुवार जिल्ह्यात २ हजार ८७१ बाधित नोंदविण्यात आले होते. आज शहरात २०५४ तर ग्रामीण भागात १ हजार ११५ बाधितांची नोंद झाली. जिल्ह्याबाहेरील १४१ जण बाधित आढळून आले. त्यामुळे जिल्ह्यातील एकूण बाधितांची संख्या ५ लाख ५३ हजार ४७० पर्यंत पोहोचली.

साडेचार हजारांवर बाधित कोरोनामुक्त

गेल्या दोन दिवसांपासून बाधितांच्या तुलनेत कोरोनामुक्त झालेल्यांची संख्या अधिक दिसून आली. मागील चोविस तासांत ४ हजार ५८३ जणांनी कोरोनावर मात केली. जिल्ह्यात आतापर्यंत ५ लाख ६१ हजार १३८ जणांनी कोरोनातून सावरले.