नागपूर : केंद्रीय मंत्री नितीन गडकरी यांच्या पत्नी तसेच सेवा सदन शिक्षण संस्थेच्या अध्यक्षा कांचन गडकरी यांनी सोमवारी मेट्रोतून प्रवास केला. मेट्रो प्रवासाचा आनंद लुटताना अलगद ‘हे नागपूर की सिंगापूर’ असे गौरवोद्‍गार त्यांनी काढले. त्यांनी झाशी राणी मेट्रो स्टेशन ते लोकमान्यनगरपर्यंत मेट्रोतून प्रवास केला.

गेल्या काही दिवसांत मेट्रोतून प्रवास करणाऱ्यांच्या संख्येत मोठी वाढ झाली आहे. अनेकांना मेट्रोतून प्रवासाचा मोह आवरता आला नाही. आज केंद्रीय रस्ते परिवहनमंत्री नितीन गडकरी यांच्या पत्नी व सेवा सदन शिक्षण संस्थेच्या अध्यक्षा कांचन गडकरी यांनी सहकाऱ्यांसोबत मेट्रोतून प्रवास केला.

जाणून घ्या - शेतातील विहिरीत तरंगतांना दिसला बिबट्याचा मृतदेह; बाहेर काढताच उपस्थितांच्या अंगाचा उडाला थरकाप

मेट्रोच्या लोकार्पणानंतर केंद्रीयमंत्री गडकरी यांनी मेट्रोतून प्रवास केला. परंतु सोमवारी प्रथमच त्यांच्या सौभाग्यवतींनी प्रवास केला. त्यांनी महामेट्रोचे कार्ड खरेदी केले. त्याचा वापर करीत त्यांनी मेट्रोतून प्रवासाचा आनंद लुटला.

हिंगणा मार्गावरील अंबाझरीचे सौंदर्यही त्यांनी टिपले. यावेळी त्यांनी मेट्रोतून प्रवासादरम्यान येथील सुविधांचे कौतुक केले. माझी मेट्रो नागपूरच्या वैभवात मानाचा तुरा असल्याचे त्या म्हणाल्या. मेट्रोमध्ये प्रवासादरम्यान नागपूर नव्हे तर सिंगापूरसारख्या शहरात असल्याचे भासते, असे त्या म्हणाल्या.

अधिक माहितीसाठी - गाढ झोपेत असताना आला मोठा आवाज, घराबाहेर धाव घेताच दिसलं थरारक दृश्य

नागपूरकरांना उत्कृष्ट वाहतूक सेवा यानिमित्त मिळाली असून अतिशय कमी दरामध्ये जास्तीत जास्त अंतर कापता येते, नागपूरकरांनी या सेवेचा फायदा घ्यावा, असे आवाहन त्यांनी केले. प्रत्येक स्टेशनवरून दर १५ मिनिटांत मेट्रोची प्रवासी सेवा सुरू आहे.

संपादन - नीलेश डाखोरे