नागपूर : राष्ट्रीय लोकसंख्या नोंदणी आणि सुधारित नागरिकत्व कायद्याच्या माध्यमातून भाजप धार्मिकीकरण करण्याचा प्रयत्न करीत आहे. हिंदू आणि मुस्लिमांमध्ये दंगली भडकाव्या हे मोदी-शहा यांचे प्रयत्न अहिंसेनेच हाणून पाडा, असे आवाहन ज्येष्ठ पत्रकार कुमार केतकर यांनी केले.
वसंतराव देशपांडे सभागृहात संवैधानिक जागरण कार्यक्रमात आंबेडकरी विचारवंत सुखदेव थोरात, अन्वर सिद्दीकी, प्रफुल्ल गुडधे पाटील आदी उपस्थित होते. केतकर पुढे म्हणाले, मोदी व शहांचे या देशाचे विभाजन करून वेगळ्या प्रकारचे हिंदुराष्ट्र निर्माण करण्याचे मनसुबे आहेत. पारतंत्र्यात असताना हिंदू महासभा तसेच राष्ट्रीय स्वयंसेवक संघाला देशाची फाळणी हवी होती. तीच मागणी मोदी व शहा सीएए, एनआरसी व एनआरआरच्या माध्यमातून पुढे नेत आहेत. त्यांना भारताचे हिंदुराष्ट्र करायचे आहे, असा आरोप केतकर यांनी केला.
या विषयावरून देशात दंगली उसळाव्यात असे मोदी-शहांना वाटते आणि वाटत होते. दंगली उसळल्या असत्या तर देशात अंतर्गत आणीबाणी लावून धरपकड केली असती. पण, या देशातील दलित व मुस्लिमांनी संविधान तसेच तिरंगा हातात धरून अहिंसेच्या मार्गाने निषेध करणे सुरू केला आहे. मोदी व शहांना या अहिंसेचीच धास्ती बसली आहे. देशभर होत असलेल्या आंदोलनांना चेहरा, नेतृत्व वा जाहीरनामा असे काहीही नाही. तेव्हा लोकांनी स्वयंस्फूर्त व स्वयंभू नेतृत्वाखालीच हे आंदोलन असेच अहिंसेने सुरू ठेवावे, असे आवाहन केतकर यांनी केले.
मोदींना 2014 मध्ये 31 टक्के व 2019 मध्ये 31 टक्के मते मिळाली. म्हणजे 63 टक्के लोकांनी त्यांना मते दिली नाही. कागदपत्रे सादर करू न शकल्याच्या नावाखाली अशांची नावे मतदारयादीतून वगळण्याचे कारस्थान मोदी व शहांनी रचले आहे. कारण त्यांना उर्वरित 35 टक्क्यांच्या भरवशावर परत सत्तेवर यायचे आहे, असे केतकर म्हणाले.
"सीएए म्हणजे मनुस्मृतीचा उत्तरार्ध'
आज जगभरात 53 ते 57 मुस्लिम राष्ट्रे आहेत. या राष्ट्रात भारतीय काम करतात. तेथे हिंदूंची संख्याही लक्षणीय आहे. या देशांनी उद्या त्यांना मायदेशी परत पाठवण्याचा निर्णय घेतला तर किती महागात पडेल याचा विचार होणे गरजेचे आहे, असे सुखदेव थोरात म्हणाले. सीएए म्हणजे मनुस्मृतीचा उत्तरार्ध असून दलितांना पुन्हा एकदा गावकुसाबाहेर काढण्याचे प्रयत्न असल्याचेही थोरात यांनी सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.