नागपूर : वेळ सकाळी साडेऩऊची. स्थळ मेडिकलसमोरचा रस्ता. येथील फुटपाथला लागून असलेल्या एका चहा टपरीवर तो युवक दिसतो. एक पन्नाशीतील महिला मेडिकलमध्ये येत होती. सोबत कोणीच नव्हते. अचानक महिलेला अस्वस्थ वाटू लागले. काही क्षणाच्या आत महिलेला भोवळ आली.
रस्त्याच्या कडेला ती ती कोसळणारच होती, परंतु बाजुने हातात चहाची केटली घेऊन येत असलेल्या युवकाने आधार दिला. चहाची केटली तेथेच सोडून त्या महिलेस बाह्यरुग्ण विभागात घेऊन गेला. कार्ड काढले, डॉक्टरच्या तपासणी केंद्रांजवळ बसवले. तेथील एका शिपायाला सांगून युवक निघून गेला.
शनिवारी सकाळी दहा वाजता पोटाच्या आजारावरील उपचारासाठी ती महिला मेडिकलमध्ये आली होती. परंतु पोटात अन्नाचा कण नव्हता. चेहरा निस्तेज दिसत होता. मागचा पुढचा कुठलाही विचार न करता महिलेला दोन्ही हातात उचलून धरले आणि या चहावाल्या युवकाने मेडिकलमधील मेडिसीन विभागाच्या दिशेने झपाझप पावले टाकत त्याने ओपीडी गाठली. तेथे महिलेस बसवून ठेवल्यानतर काही वेळाने पुन्हा परत आला. या कोरोनाच्या काळात नातेवाईक जवळ येत नाही, तेथे शनिवारी घडलेला हा प्रसंग समाजात माणूसकीचा अद्याप पूर्णपणे कडेलोट झालेला नाही हेच सांगून गेला.
कोरोनामुळे महिलेशी रक्ताचे नाते असलेले कोणीच आले नाही, मात्र कुठलेही नाते नसताना हा तरुण मदतीला धावून आला. त्या तरुणाचे नाव महिलेस माहित नाही. गुड्डू असे सांगण्यात आले. तो या परिसरात अनेक गरीब रुग्णांच्या नातेवाईकांना चहा देण्यासाठी केटली घेऊन येतो. चहा देतो आणि निघून जातो. या महिलेचा जीव वाचवण्यासाठी देवदुतासारखा गुड्डू धावून आला. व्यवसायाने वंजारीगर परिसरात त्याचे घर आहे. महिलेची अवस्था पाहून त्याच्या काळजालाही पाझर फुठला आणि रक्ताचे कसलेही नाते नसताना तो महिलेचा जीव वाचवण्यासाठी धावून आला.
या परिसरात स्टॅण्डवर असलेल्या एका व्यक्तीने गुड्डूची ओळख सांगितली. आईला बरे नसल्याने काही वर्षांपुर्वी मेडिकलमध्ये घेऊन आला होता. महिनाभर उपचार करण्यात आले, परंतु त्याची आई उपचारादरम्यान दगावली होती. मात्र त्यावेळी मेडिकलमध्ये वैद्यकीय अधिकारी असलेले डॉ. मुरारी सिंग यांनी मोलाची मदत त्याला केली होती. यामुळेच मदतीला धावून जाण्याचा आदर्श त्याने स्वीकारला. तेव्हांपासून मध्ये-मध्ये हा युवक मेडिकलमध्ये येतो. रुग्णांच्या नातेवाईकांना चहा देऊन निघून जातो. त्याने दाखविलेल्या प्रसंगावधानाने समाजातील तरुणाईसमोर एक नवा आदर्श गुडूने घालून दिला. महिलेला डॉक्टरांच्या हवाली केल्यानंतर आपल्या कामासाठी निरोप घेतला. ही माणूसकी पाहून एरव्ही अजब गजब घटनांची सवय झालेल्या मेडिकलचा परिसरही काहीसा सुखावला.
संपादन - अथर्व महांकाळ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.