नागपूर : संपूर्ण नागपुरात "मिशन बिगीन अगेन'अंतर्गत लॉकडाउनमध्ये शिथिलता देण्यात आली असली तरी अनेक जण नियमांचे पालन करीत नाहीत. गोपालनगर, प्रतापनगर परिसरात काही दुकाने सम-विषम नियमांचे उल्लंघन करताना आढळले. महापौरांच्या निर्देशावरून त्यांच्यावर मनपाच्या उपद्रव शोध पथकाने दंडाची कारवाई केली.

वा रे पठ्ठे...शाळेलाच पाठवले ऑनलाइन क्लासेसचे बिल

महापौर जोशी यांनी दुकानदारांवर तत्काळ दंड ठोठावला. आयुक्त मुंढे यांनी दुकानदारांची कानउघडणी करतानाच त्यांच्यावर कारवाईचे निर्देश अधिकाऱ्यांना दिले. जोशी यांनी लक्ष्मीनगर झोनमधील बाजारात पायी दौरा केला. त्यांच्यासोबत लक्ष्मीनगर झोनचे सभापती प्रकाश भोयर, शिक्षण सभापती प्रा. दिलीप दिवे, उपसभापती प्रमोद तभाने, लक्ष्मीनगर झोनचे सहायक आयुक्त राजू भिवगडे होते.

नागपुरात बहरले सोनू सूदचे प्रेम; शंकरनगरातील ब्रेड पकोडा व कटिंग चहाचा होता दिवाना

माटे चौक, गोपालनगर, प्रतापनगर, खामला, देवनगर आदी भागात महापौरांनी शासनाच्या दिशानिर्देशांनुसार सम आणि विषम तारखांचा नियम पाळण्याचे आवाहन केले. मास्कचा वापर करावा, शारीरिक अंतराचे पालन करावे, असे आवाहन करीत त्यांनी दुकानदारांना नियम पाळा अन्यथा कारवाईला सामोरे जावे लागेल, असा इशारा त्यांनी दिला.

ती आली... तिने पाहिलं अन्‌ जिंकलं, आता? वाचा 'वन फिल्म वंडर'ची कहाणी...

मनपा आयुक्त मुंढे झाशी राणी चौक ते आनंद टॉकीजपर्यंतच्या मार्गावर फिरले. त्यांनी नियम मोडणाऱ्या दुकानदारांची चांगलीच कानउघाडणी केली. मास्क न वापरणारे दुकानांतील कर्मचारी व ग्राहकांवरही उपद्रव शोध पथकाने आयुक्तांच्या निर्देशावरून दंड आकारला.

बर्डी, कॉटन मार्केट परिसर, सुभाष रोड, चिटणवीस पार्क, शिवाजी पुतळा ते गांधीसागरदरम्यानच्या मार्गावरील बाजारात फिरून नियम मोडणाऱ्यांवर कारवाई करण्याचे आयुक्तांनी आदेश दिले. हॉकर्स कसे काय दुकान थाटून बसले? याबाबत त्यांनी अधिकाऱ्यांना जाब विचारला. हॉकर्सवरही यावेळी कारवाई करण्यात आली. 

वाहनचालकांवरही कारवाई 
दुचाकीवर एक आणि चार चाकीमध्ये चालकासहित तिघांना परवानगी आहे. मात्र, नियमापेक्षा अधिक नागरिक दिसून आल्याने वाहनचालकांवरही कारवाई करण्याचे निर्देश त्यांनी पोलिसांना दिले. पोलिसांनी अनेक दुचाकी व चारचाकी वाहनचालकांवर तत्काळ कारवाई केली. 

नियम न पाळल्यास कडक कारवाई : मुंढे 
मिशन बिगिन अगेनअंतर्गत दिलेली नियमातील शिथिलता नागरिकांच्या भल्यासाठी आहे. मात्र, दिशानिर्देशांचे पालन होत नसल्याचे वाढत्या रुग्णसंख्येवरून लक्षात येत आहे. नागरिकांनी नियमांचे पालन न केल्यास कडक कारवाई करण्यात येईल, असा इशारा आयुक्त मुंढे यांनी दिला. 

(संपादन : प्रशांत राॅय)