उमरेड : उमरेड-कऱ्हांडला व्याघ्र प्रकल्पात शनिवारी वन कर्मचाऱ्याला वाघाचा मृतदेह कुजलेल्या अवस्थेत आढळला. दोन वाघांच्या झुंजीत या वाघाचा मृत्यू झाला असावा, असा अंदाज व्यक्त होत आहे.

उमरेड-पवनी-कऱ्हांडला अभयारण्यातील वनरक्षक जफरअली सदय्य हे १४१८ या संरक्षित क्षेत्रात गस्तीवर असताना त्यांना उग्र वास आला. त्यामुळे त्यांनी नाल्याच्या किनारी दाट झुडपात तपासणी केली. तेव्हा त्यांना वाघाचा मृतदेह कुजलेला आढळला. घटनेचा माहिती क्षेत्र संचालक श्रीमती ए. श्रीलक्ष्मी, पेंच व्याघ्र प्रकल्प अधिकारी प्रमोद पंचभाई यांना दिली. ते घटनास्थळी दाखल झाले.

शवविच्छेदन करण्यात आले. वाघाचे सर्व अवयव शाबूत होते. नियमानुसार वाघाचे दहन करण्यात आले. प्राथमिक तपासणीत वाघाच्या अंगावर सुळे घुसल्याच्या खुणा होत्या. तर खुब्याचे हाड तुटलेल्या अवस्थेत होते. दोन वाघांच्या झुंजीत वाघाचा मृत्यू झाल्याचा अंदाज पशुवैद्यकीय अधिकाऱ्यांनी वर्तविला. दहन करताना सहायय्क वन संरक्षक मंगेश ठेंगडी, मानद वन्यजीव रक्षक अविनाश लोंढे, प्रफुल्ल भांबुरकर, पशुवैद्यकीय अधिकारी डॉ. रोहिणी टेंभुर्णे उपस्थित होते. तपास मंगेश टेंगडी आणि वन परीक्षेत्र अधिकारी मंगेश एम. ताटे करीत आहेत.