नागपूर : सर्वोच्च न्यायालयाने शुक्रवारी (ता.२८) अंतिम वर्षांच्या परीक्षा घेण्याचे आदेश दिले. या आदेशानंतर विद्यापीठ कामाला लागले आहे. परीक्षा घेण्यासाठी परीक्षा व मूल्यमापन मंडळाची तयारी पूर्ण असून अंतिम वर्षात ७५ हजारावर विद्यार्थ्यांचा समावेश करण्यात येणार आहे. त्यामुळे परीक्षा र्निविघ्न पार पाडण्यासाठी विद्यापीठाच्या परीक्षा विभागाचा चांगलाच कस लागणार आहे.

कोरोनामुळे देशभरात असलेल्या टाळेबंदीमुळे महाविद्यालय आणि विद्यापीठाचे कामकाज बंद करण्यात आले. त्यानंतर परीक्षाही पुढे ढकलण्यात आल्यात. परीक्षेतील अनिश्‍चितेमुळे विद्यार्थी मानसिक तणावात होते. राज्यात कोरोनाचा प्रादुर्भाव वाढत असल्याने सरकारने परीक्षा घेऊ नये असा पवित्रा घेतल्याने अंतिम वर्षाच्या परीक्षेबाबत अनिश्चितता निर्माण झाली होती. यावर अनुदान आयोगाने पहिल्यांदा सोयीनुसार परीक्षा घेण्याचे आदेश दिले होते. 

क्लिक करा - आयुक्त मुंढेच्या बदलीसाठी कोणी केला समझोता?, वाचा सविस्तर

मात्र, त्यात अचानक बदल करुन आयोगाने परीक्षा घेण्याचे आदेश काढले. यावरुन युवासेनेने सर्वोच्च न्यायालयात याचिका दाखल केली होती. आज सर्वोच्च न्यायालयाने यावर सुनावणी घेत, अंतिम वर्षांच्या परीक्षा घेण्याचे आदेश दिले. परीक्षबाबत कुठलही निर्णय आला तरी विद्यापीठाकडून परीक्षेची पूर्ण तयारी करण्यात आली होती. आता निर्णय आल्याने विद्यापीठ कामाला लागले आहे. मात्र, कोरोनाच्या वाढत्या प्रादुर्भावात विद्यापीठ र्निविघ्न परीक्षा पार पाडण्यासाठी विद्यापीठाचा चांगलाच कस लागणार आहे.

केंद्रांच्या संख्येत होणार वाढ

विद्यापीठाच्या परीक्षेसाठी परीक्षा मंडळाकडून जवळपास १३१ केंद्रांची तयार करण्यात आलेली आहेत. मात्र, "सोशल डिस्टंसिंग'चा विचार केल्यास विद्यापीठाला किमान दोनशेहुन अधिक केंद्र तयार करावी लागणार आहे. आता विद्यापीठाचा भर नियोजनावर राहणार असून केवळ एक महिना हाती असल्याने परीक्षा मंडळाला बरीच मेहनत घ्यावी लागणार आहे.

अधिक माहितीसाठी - पोलिस दलातील वरिष्ठ अधिकारी नाराज! काय आहे नेमका बदल्यांचा ‘पेच’

अंतिम वर्षाच्या परीक्षा घेण्यासाठी विद्यापीठाची तयारी पूर्ण असून सरकारकडून आदेश येताच, परीक्षा मंडळाची बैठक घेऊन परीक्षेचे वेळापत्रक जाहीर करण्यात येईल.
डॉ. प्रफुल्ल साबळे,
संचालक, परीक्षा व मूल्यमापन मंडळ.

संपादन - अथर्व महांकाळ