नागपूर : राज्याचे गृहमंत्री, पालकमंत्री आणि पोलिस महासंचालकांच्या उपस्थितीत भव्य कार्यक्रम घेऊन पाचपावलीतील पोलिसांच्या सदनिकांचे उद्घाटन झाले. प्रातनिधिक स्वरूपात काही जणांना घराच्या चाव्या देण्यात आल्या. परंतु, तेथे कोविड सेंटर असल्याने दोनशे पोलिस कुटुंबावर आजही स्वतःचे घर असतानाही भाड्याने राहायची वेळ आली आहे.

नागपूर पोलिस कर्मचारी यांच्या निवासाचा मोठा प्रश्‍न निर्माण झाला आहे. पाचपावली पोलिस स्टेशनला लागून असलेली जुनी वसाहत तोडून नवीन वसाहत बांधण्यात आली. आधुनिक पायाभूत सुविधांनी सुसज्ज अशा या ७ इमारती असून १९६ क्वार्टर्स आहेत. त्याचप्रमाणे लहान मुलांसाठी उद्यान, विद्यार्थ्यांसाठी वाचनालय आणि कार्यक्रमासाठी प्रशस्त सभागृहाची सोय सुद्धा येथे करण्यात आली आहे.

अधिक माहितीसाठी - हरभऱ्याची गंजी लावून घरी परतला शेतकरी, सायंकाळी शेतात जाताच सरकली पायाखालची जमीन

पोलिसांच्या बहुमजली वसाहतींचे बांधकाम २०१७ मध्ये सुरू झाले होते व २०२० पर्यंत बांधकाम पूर्ण देखील झाले. या बहुमजली सदनिकांचे उद्घाटन महाराष्ट्राचे गृहमंत्री अनिल देशमुख, पालकमंत्री डॉ. नितीन राऊत, पोलिस महासंचालक हेमंतकुमार नगराळे यांच्या हस्ते २५ जानेवारीला व्हर्च्युअली करण्यात आले. तेव्हा १५ पोलिस कर्मचाऱ्यांना त्यांच्या हस्ते घराच्या चाव्या सोपविण्यात आल्या होत्या. परंतु, आजपर्यंत पोलिस कर्मचाऱ्यांना निवासासाठी उपलब्ध करून देण्यात आल्या नाहीत. 

कोरोनाबाधितांचा निवास

नागपूर येथे अपुऱ्या जागेचा प्रश्न असल्यामुळे पोलिस प्रशासनाने या इमारतींचा वापर क्वॉरंटाईन सेंटरसाठी करण्याची परवानगी दिली. या ठिकाणी आतापर्यंत या वसाहतीत १,२६३ पेक्षा जास्त कोरोनाबाधितांना व संशयितांना ठेवण्यात आलेले होते. मात्र, आता महिनाभरापासून रुग्णांची संख्या कमी आहे. त्यामुळे ही इमारत पोलिसांना हस्तांतरित केल्यास कोणतीही अडचण येणार नसल्याचे पोलिस कर्मचाऱ्यांचे म्हणणे आहे.

जाणून घ्या - प्रेम एकीवर अन् साक्षगंध दुसरीशी; विवाहित प्रेयसीवर बलात्कार तर होणाऱ्या पत्नीला दिला दगा

इमारतीत केली तोडफोड

काही असामाजिक तत्त्वांनी या इमारतींची अवस्था दयनीय करून ठेवली आहे. काही क्वार्टर्स मध्ये पंखे, मॅाड्यूलर किचनचे पल्ले तोडले, तर काही ठिकाणच्या नळ, तोट्या चोरल्या, काही ठिकाणी पांढऱ्या भिंती थुंकून लाल केल्या आहेत. सध्या स्थिती अशी आहे की या वसाहतींची दुरुस्ती झाल्याशिवाय येथे राहणे अवघड आहे.