नागपूर : पावसाने अचानक दांडी मारल्याने उकाडा वाढला आहे. पावसाअभावी सर्वसामान्य नागरिकांसह बळीराजाही कमालीचा त्रस्त व चिंतित आहे. त्यामुळे प्रत्येकच जण आता वरुणराजाला आर्जव करीत आहेत.
13 जूनला मॉन्सूनचे आगमन झाल्यानंतर पावसाने काही दिवस नियमितपणे नागपूर व विदर्भात हजेरी लावली. 25 जूनच्या मध्यरात्री शहरात मेघगर्जनेसह 60 मिलिमीटर पाऊस बरसला होता. तेव्हापासून पाऊस गायब झाला. आभाळ भरून येते. परंतु, पावसाचा थेंबही पडत नाही. त्यामुळे कमाल तापमान वाढून 35 अंशांवर गेले.
परिणामत: असह्य उकाडा, अवस्वस्थता व चिडचिड जाणवू लागली आहे. गेल्या एक-दोन दिवसांपासून दुपारच्या सुमारास उन्हाचे सौम्य चटके बसताहेत. त्यामुळे नाइलाजाने नागरिकांना पुन्हा कूलर व एसी सुरू करावे लागले. हवामान विभागाने शनिवारी व रविवारी विदर्भात वादळी पावसाचाही इशारा दिलेला होता. दुर्दैवाने तो इशारादेखील फोल ठरला.
मॉन्सूनला जोर नसल्यामुळे सध्यातरी दमदार पावसाची शक्यता कमीच आहे. हवामान विभागानेही जोरदार पावसासाठी अनुकूल "सिस्टीम' बनली नसल्याचे सांगितले. या आठवड्यात जोरदार पाऊस अपेक्षित नसला तरी, काही ठिकाणी हलक्या सरींची दाट शक्यता आहे.
पावसाअभावी पेरण्याही खोळंबल्या आहेत. अनेक जिल्ह्यांमध्ये पेरण्यांना ब्रेक लागला आहे. नागपूर व अन्य एक-दोन जिल्ह्यांचा अपवादवगळता, बहुतांश जिल्ह्यांमध्ये पाऊस अपेक्षेप्रमाणे कमी पडलेला आहे. आणखी दोन-चार दिवस पाऊस न आल्यास शेतकऱ्यांच्या मानगुटीवर दुबार पेरण्यांचे संकट उभे ठाकणार आहे. आधीच आर्थिक संकटात सापडलेल्या बळीराजासाठी ही निश्चितच धोक्याची घंटा आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.