नागपूर : आदर्श पुरस्कारासाठी विभागीय चौकशी सुरू असलेल्या शिक्षकाच्या निवडप्रकरणी गट शिक्षणाधिकारी यांच्यासह प्रस्ताव सादर करणारा शिक्षकही अडचणीत येणार आहेत.  

शिक्षणतज्ज्ञ डॉ. सर्वपल्ली राधाकृष्णन यांच्या जयंतीचे औचित्य साधून दरवर्षीय जिल्हा परिषदेच्या वतीने जि.प. शाळांमधील शिक्षकांना 'आदर्श शिक्षक' पुरस्कार देऊन गौरव करण्यात येतो. प्राथमिक गटातून १३ व माध्यमिक गटातून २ अशा १५ शिक्षकांना आदर्श शिक्षक या पुरस्काराने गौरविण्यात येते. यंदाही या पुरस्कारासाठी जि.प.च्या शिक्षण विभागाकडे एकूण ३९ प्रस्ताव आले होते.

जाहीर केलेला आदर्श पुरस्कार थांबविला, जि. प.वर नामुष्की

यापैकी ३६ प्राथमिक साठी तर ३ माध्यमिक गटासाठी आले होते. आदर्श पुरस्कारसाठी शिक्षकाची निवड करताना काही निकष आहेत. यात गैरव्यवहाराचे आरोपासोबत विभागीय चौकशी सुरू नसणे महत्त्वाचे आहे.

परंतु या निकषाला डावलून विभागीय चौकशी सुरू असलेल्या एका शिक्षकाची आदर्श पुरस्करासाठी जिल्हा परिषदने निवड केली. काही पात्र शिक्षकांना डावलल्याचीही ओरड होत असल्याने निवड प्रक्रियेवर प्रश्न चिन्ह उपस्थित करण्यात आले. शिक्षण सभापती पाटील यांनी कोणत्याप्रकारची नियमबाह्य निवड झाली नसल्याचा दावा केला होता.

परंतु त्यांचा दावा फोल ठरला आहे. त्यामुळे आता संबंधित शिक्षकाला जाहीर करण्यात आलेला पुरस्कार थांबविण्याची नामुष्की जिल्हा परिषदेवर ओढवली. सूत्रांकडून मिळालेल्या माहितीनुसार विभागीच चौकशी असताना प्रस्ताव समितीसमोर पवठविणे चुकीचे आहे. गटशिक्षण अधिकाऱ्यांनी कर्तव्यात कसूर केला. गट विकास अधिकाऱ्यांचाही यात दोष आहे.

विशेष म्हणजे संबंधित शिक्षकाला चौकशी सुरू असल्याची माहिती असताना प्रस्ताव सादर करायला नको होता. त्यामुळे गटशिक्षणाधिकाऱ्यासह शिक्षकही दोषी आहे. त्यामुळे या प्रकरणी सर्वच अडचणीत येणार असल्याचे सांगण्याच येते.

ठळक बातमी - काय सांगता! नागपुरातील या तलावातून होतो चक्क एका मोठ्या नदीचा उगम; जाणून घ्या काय काय आहे इतिहास

राज्य मंत्र्यांकडे तक्रार

आदर्श शिक्षक पुरस्कार निवडीत भेदभाव झाल्याची तक्रार प्रहार संघटनेचे जिल्हा प्रमुख रमेश कारामोरे यांनी शालेय शिक्षण राज्यमंत्री बच्चू कडू यांच्याकडे केली असून त्यांनी चौकशीचे आदेश दिले.