नागपूर ः शरीरावर आलेली एक गाठ काढण्यासाठी मागील आठ दिवसांपासून एक रुग्ण मेडिकलच्या वॉर्ड क्रमांक २३ मध्ये दाखल आहे. दर दोन दिवसानंतर गाठ काढण्याची शस्रक्रिया करण्यासाठी रुग्णाला शस्त्रक्रियागारात नेले जाते. शस्त्रक्रिया करणार म्हणून दिवसभर उपाशी ठेवण्यात येते. मध्येच कोणतेतरी कारण सांगून परत पाठवण्यात येते. तीन वेळा रुग्णाला परत पाठवण्यात आल्यामुळे रुग्णाचे नातेवाईक संतप्त झाले. आणखी किती दिवस शस्त्रक्रियेच्या प्रतिक्षेत राहायचे हा सवाल नातेवाईकांनी विचारला आहे.

जाणून घ्या - २५ वर्षीय युवकाने उभारला देशातील पहिला ‘स्काय वॉक’; पंतप्रधान कार्यालयाने केले पंकजचे कौतुक 

आठवडाभरापुर्वी मेडिकलमध्ये दाखल झालेल्या रुग्णाचे नाव संदीप दुपारे असे आहे. सर्जरी विभागाच्या युनिट क्रमांक ६ मध्ये दाखल आहे. पहिल्यांदा शस्त्रक्रिया करण्यासाठी सकाळी शस्त्रक्रियागारात नेण्यात आले. पाणीसुद्धा पिता आले नाही. दिवसभर उपाशी ठेवण्यात आल्यानंतर डॉक्टरांनी तातडीची शस्त्रक्रिया आली असल्याचे सांगत दुपारे यांना परत पाठवले. दुसऱ्यांदा भुलतज्ज्ञ भुल देण्यास तयार नसल्याने शस्त्रक्रिया पुढे ढकलण्यात आली. पुन्हा एकादा शस्त्रक्रियागारात नेल्यानंतर उपाशी जीवाला परत पाठवले.

संदीप दुपारे एका खासगी कंपनीत कामाला आहे. सात दिवसांच्या सुट्या संपल्या. कार्यालयातून फोन येत आहेत, मेडिकलमधील डॉक्टर शस्त्रक्रिया करीत नाही. दर दिवसाला गाठ वाढत आहे. यापुर्वीही असे प्रकार मेडिकलमध्ये घडलेले आहेत.
यासंदर्भात मेडिकलचे वैद्यकीय अधीक्षक डॉ. अविनाश गावंडे यांच्याशी संपर्क साधला, परंतु ते रजेवर असल्याने संपर्क होऊ शकला नाही.

अधिक माहितीसाठी - लग्नाला यायचं बरं का! असं म्हणत दिलं लग्नाचं 'ओलं' निमंत्रण; पत्रिका बघून भलभल्यांना बसला धक्का

रेफर टू मेयो

मेडिकलमधील एमआरआय मशीन बंद असल्याने आठ दिवसांपुर्वी एका रुग्णाला मेडिकलमधील डॉक्टरांनी रेफर केले. मात्र त्या रुग्णाला २२ डिसेंबर ही तारीख दिली. रुग्णाने मेडिकलमध्ये डॉक्टरांना सांगितले असता, डॉक्टरांनी त्या रुग्णाला सुटी दिली. यामुळे हा रुग्ण बुट्टीबोरी येथे घरी निघून गेला, अशाप्रकारे हलगर्जीपणा मेडिकलमध्ये सुरू असल्याची तक्रार समता सैनिक दलातर्फे देण्यात आली आहे. 

संपादन - अथर्व महांकाळ