नागपूर : राष्ट्रसंत तुकडोजी महाराज नागपूर विद्यापीठाला राष्ट्रीय मूल्यांकन व मानांकन परिषदेने (नॅक) ‘अ’ श्रेणी दिली आहे. कोरोनामुळे दोन वर्षांपासून विस्कटलेली शैक्षणिक व्यवस्था आणि कर्मचाऱ्यांची संख्या कमी असताना विद्यापीठाने ‘अ’ क्षेणी कायम राखली आहे. हे सामूहिक यश असल्याचे कुलगुरू डॉ. सुभाष चौधरी यांनी पत्रकारांशी बोलताना सांगितले.

दोन ते चार सप्टेंबर या कालावधीत नॅक चमूने विद्यापीठास मूल्यांकन देण्याच्या अनुषंगाने भेट दिली होती. प्रशासनानेही कोरोना नियमांचे पालन करून भेटीचे उत्तम नियोजन केले होते. यासाठी विविध समित्या तयार केल्या होत्या. पहिल्या दिवसाच्या भेटीत १२ विभागांचे सादरीकरण झाले तर दुसऱ्या दिवशी १५ विभागांनी सादरीकरण केले.

समितीने विद्यार्थी, पालक, संशोधक, शिक्षक, शिक्षकेतर कर्मचारी, अधिकारी आणि कर्मचारी यांच्याशी नॅकच्या चमूने संवाद साधला. त्याचबरोबर विविध विभागांना भेटी, प्रयोगशाळा पाहणी, पायाभूत सुविधा, ग्रंथालय भेटी देण्यात आल्या. यामध्ये अध्ययन व अध्यापन प्रणाली आणि संस्थात्मक मूल्ये आणि उत्तम उपक्रम विद्यापीठासाठी उपयोगी ठरल्या.

विद्यापीठाला राष्ट्रीय स्तरावर पुन्हा एकदा सन्मान मिळावा यासाठीची जोरदार तयारी केली होती. विद्यापीठातील एकूण शैक्षणिक वातावरण, विकासकामे, संशोधन आणि विद्यापीठातील असलेल्या सोयी सुविधा, शैक्षणिक विकास, ऑनलाइन परीक्षा पद्धती, आभासी शिक्षण तसेच संशोधनात्मक प्रगती या सगळ्याचे सादरीकरण विद्यापीठाकडून करण्यात आले होते.

राजनाथ सिंगांना निमंत्रण

विद्यापीठ सुरू करणार असलेल्या संरक्षणविषयक अभ्यासक्रमाच्या उद्घाटनासाठी संरक्षण मंत्री राजनाथ सिंह यांना आमंत्रण देण्यात आलेले आहे. अद्यापही त्यांच्या कडून कोणताही निरोप आलेले नाही. विद्यापीठाकडून प्रयत्न केले जात आहे.