नागपूर ः मागील महिन्यात राज्य सरकारने सातवा वेतन आयोग लागू करण्याचे आदेश दिल्यानंतरही महिनाभरापासून प्रतीक्षेत असलेल्या कर्मचाऱ्यांसाठी आज आयुक्तांनी ‘गुड न्यूज' दिली. पुढील फेब्रुवारी महिन्यात कर्मचारी व अधिकाऱ्यांना सातवा वेतन आयोगासह वेतन मिळणार आहे. वित्त व लेखा विभागाने सर्व विभागांना सातव्या वेतन आयोगानुसार वेतन निश्चितीची प्रक्रिया करण्याच्या सूचना केल्या.
मुख्यमंत्री उद्धव ठाकरे यांनी मागील ८ डिसेंबरला मनपा कर्मचारी व अधिकाऱ्यांंना सातवा वेतन आयोग लागू करण्याचे आदेश दिले होते. त्यामुळे कर्मचारी व अधिकाऱ्यांत उत्साह होता. परंतु गेल्या महिनाभर प्रक्रिया रखडल्याने कर्मचाऱ्यांत निराशा होता. ‘सकाळ'ने ५ जानेवारीला ठळकपणे ‘महापालिकेने मुख्यमंत्र्यांचेही आदेश पायदळी तुडविले‘ या मथळ्यासह वृत्त प्रकाशित करीत प्रशासनाचे लक्ष वेधले होते. वित्त व लेखा विभागाने प्रक्रिया संथ केल्याकडेही आयुक्तांचे वृत्तातून लक्ष वेधन्यात आले होते.
आज आयुक्तांच्या आदेशाने वित्त व लेखा विभागाने सर्व विभागांंना सातव्या वेतन आयोगानुसार वेतन निश्चिती करण्याची कार्यवाही करण्याच्या सूचना दिल्या. सर्व कर्मचाऱ्यांकडून विकल्प फॉर्म, वेतन निश्चिती फॉर्म तसेच वचनपत्र भरून घेत सेवापुस्तकात नोंद करण्याच्या सूचनाही प्रमुख वित्त व लेखा अधिकारी विजय कोल्हे यांनी केल्या आहेत.
सर्व कर्मचाऱ्यांना जानेवारीचे फेब्रुवारीमध्ये मिळणारे वेतन सातव्या वेतन आयोगासह देण्यात येणार असल्याने कार्यवाहीची सर्व कागदपत्र सादर करावी, असेही त्यांनी परिपत्रकात नमुद केले आहे. महापौर दयाशंकर तिवारी यांनी कर्मचाऱ्यांचे अभिनंदन केले असून आयुक्तांनाही धन्यवाद दिले.
११ हजार कर्मचाऱ्यांना लाभ
सातव्या वेतन आयोगाचा महापालिकेतील अकरा हजार कर्मचारी, अधिकाऱ्यांना लाभ होणार आहे. आज सायंकाळी सातव्या वेतन आयोगाची माहिती मिळताच कर्मचारी आनंद साजरा केला. वेतन आयोग जानेवारीपासून लागू केल्याने महापालिकेतील राष्ट्रीय नागपूर कार्पोरेशन एम्प्लाईज असोसिएशनचे अध्यक्ष सुरेंद्र टिंगणे, संजय मोहळे, प्रवीण तंत्रपाळे, शिक्षक संघाचे राजेश गवरे यांनी आयुक्तांचे आभार मानले.
संपादन - अथर्व महांकाळ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.