नागपूर : शासकीय वैद्यकीय महाविद्यालय व रुग्णालयात (मेडिकल) लहान मुलांच्या अतिदक्षता विभागात उपचारासाठी भरती असलेल्या तीन वर्षीय चिमुकलीचा चुकीचे इंजेक्शन दिल्याने मृत्यू झाला असा आरोप नातेवाईकांनी केला आहे. रविवारची ही घटना आहे. यामुळे काही काळ तणावाचे वातावरण निर्माण झाले होते. या घटनेची माहिती मिळताच अजनी येथील पोलिस अतिदक्षता विभागात पोहोचले. पोलिसांच्या मध्यस्थीने तणाव निवळला. मात्र, या प्रकरणाची तक्रार करायची असल्यास नातेवाईकांनी पोलिस ठाण्यात यावे अशी सूचना देत पोलिस निघून गेले. या प्रकरणाची पोलिस तक्रार झाली की, नाही हे मात्र कळायला मार्ग नाही.

अवघं तीन वर्षांच वय असलेल्या संजनाला (नाव बदलले) मेडिकलच्या लहान मुलांच्या अतिदक्षता विभागात दाखल केले. मात्र, तिला मेंदूचे झटके आले. यामुळे तिला इंजेक्शन दिले. इंजेक्शन दिल्यानंतर काही वेळातच तिचा मृत्यू झाला. यामुळे नातेवाईकांनी काही वेळ गोंधळ घातला. यामुळे तणावाचे वातावरण निर्माण झाले होते.

मेडिकलमध्ये दर दिवसाला कोरोनाचे शेकडो रुग्ण उपचारासाठी येतात. याशिवाय गैर कोरोनच्या रुग्णांची गर्दी होते. तर सारे मनुष्यबळ कोरोनासाठी वापरण्यात येत असल्याने गैरकोरोना रुग्णांकडे फारसे लक्ष देण्यात येत नाही, असा आरोप नातेवाईकांनी केला आहे. अप्रशिक्षित असलेल्या इंटर्नच्या भरवशावर येथील व्यवस्था असल्याचा आरोपही नातेवाईकांनी केला.

अधिक वाचा - कुख्यात गुंड रणजित सफेलकरवर माजी मंत्र्यांचा वरदहस्त, पाच-पन्नास रुपायांची सवारी मारणारा ऑटोचालक झाला कोट्यधीश

समिती बसवून सखोल चौकशी करू
असा काही प्रकार घडला असल्याचे अद्याप कानावर आले नाही. मात्र, यासंदर्भात माहिती घेतो. समिती बसवून सखोल चौकशी करू. प्रसंगी शवविच्छेदन करून त्यातून सत्य काय ते पुढे येईलच.
- डॉ. अविनाश गावंडे,
वैद्यकीय अधिक्षक, मेडिकल