नागपूर : उच्च शिक्षण घेतल्यानंतर बहुतांश तरुण उदरनिर्वाहासाठी खासगी किंवा सरकारी नोकरीला प्राधान्य देतात. मात्र, आकाश काटोलेला नोकरी करायची नव्हती. पुण्यातील एका मल्टीनॅशनल कंपनीने देऊ केलेले लाखोंच्या पॅकेज धुडकावून लावत स्वतःचा व्यवसाय थाटला. केवळ दीड लाखाची गुंतवणूक करून सुरू केलेल्या व्यवसायाची भरभराट होऊन अवघ्या तीन वर्षांत उलाढाल पाच कोटींवर नेली. स्टार्टअपच्या माध्यमातून आकाशने अल्पावधीत साधलेली प्रगती नोकरीच्या मागे धावणाऱ्या तरुणांसाठी नवी दिशा देणारी आहे. (Startup-News-Start-Business-Tours-and-travels-nad86)

महाल परिसरात राहणारा ३० वर्षीय आकाश स्टार्टअपबद्दल म्हणाला, साधारण तीन-चार वर्षांपूर्वी एमबीए केले. त्यानंतर लगेच पुण्यातील मल्टिनॅशनल कंपनीत नोकरीसाठी अर्ज केला. कंपनीने साडेतीन लाखांचे पॅकेज देत नियुक्तीचे पत्र पाठविले. मात्र, पुण्यासारख्या मोठ्या शहरात जॉब करणे पटले नाही आणि नकार कळवत नागपुरातच राहण्याचा निर्णय घेतला. सुरुवातीला काही महिने संगणक शिक्षक व दुरुस्तीची कामे केल्यानंतर मित्राच्या मदतीने भविष्यातील योजनांवर विचारमंथन सुरू केले.

मित्रांसोबत नवनव्या आयडियाजवर चर्चा करीत असताना एकेदिवशी ‘बियॉंड डेस्टिनेशन’ची कल्पना पुढे आली. ‘बियॉंड डेस्टिनेशन’च्या माध्यमातून हॉटेल व विमानाचे तिकीट बुकिंग करण्यापासून डोमेस्टिक व इंटरनॅशनल टूर, हनिमून पॅकेज, कॉर्पोरेट टूर्स, क्रूझ, व्हिसा आदी कामे केली जातात. ऑफिसमध्ये माझी छोटीशी टीम आहे. त्यांच्या मदतीने व्यवसायाचा गाडा सुरू आहे. शाळा व महाविद्यालयांमध्ये सक्रिय असल्याने तेव्हाचा दांडगा संपर्क या व्यवसायात खूप कामी आला.

काही वर्षांपासून देशविदेशांत फिरण्याचे फॅड वाढल्याने पर्यटन क्षेत्राला चांगलाच बूम आला असून, ट्रॅव्हल एजन्सीचीही चांगली कमाई होत आहे. कोरोनामुळे जगातील अनेक देशांमध्ये लॉकडाऊनची स्थिती असली तरी व्यवसायावर फारसा फरक पडला नाही. कोरोनाच्या काळातही अपवाद वगळता ग्राहकांकडून उत्तम प्रतिसाद मिळाला आहे. आंतरराष्ट्रीय स्तरावर सध्या मालदीव आणि दुबई ‘हॉट डेस्टिनेशन’ असून, देशात सिमला, मनाली, काश्मीर व गोव्याला लोक अधिक पसंती देत आहेत.

‘स्टार्टअप’चा तरुणांना सल्ला

केंद्र व राज्य सरकारला प्रत्येकाला सरकारी नोकऱ्या देणे शक्य नाही. ती अपेक्षाही करणे चुकीचे आहे. त्यामुळे आत्मनिर्भर होण्यासाठी पंतप्रधान नरेंद्र मोदींनीही उच्चशिक्षित तरुणांना वारंवार स्वतःचा व्यवसाय (स्टार्टअप) सुरू करण्याचा सल्ला दिलेला दिला. अनेकांनी त्यांचा सल्ला मनावर घेत स्टार्टअप सुरू करून स्वतःसह इतरांचीची प्रगती साधली आहे. अनेक नावीन्यपूर्ण स्टार्टअपमुळे मोदींच्या स्टार्टअप मोहिमेला मोठा हातभार लागत आहे.

(Startup-News-Start-Business-Tours-and-travels-nad86)