कळमेश्वर (जि.नागपूर) :  अनैतिक संबंधाच्या संशयातून मी माझ्या पत्नीची हत्या केली जी साहेब! तिच्या डोक्‍यावर दगड मारला. मला आत्मसमर्पण करायचं आहे, अशी बतावणी आरोपीने पोलिसांकडे केली. आरोपीला ताब्यात घेऊन पोलिसांनी तपास सुरू केला. तर ज्या पत्नीच्या हत्येसाठी आरोपीने आत्मसमर्पण केले ती जिवंतच आढळल्याची खळबळजनक घटना तेलगाव येथे घडली.

सविस्तर वाचा:  कोण रे ते रिकामटेकडे, देवबाभळीच्या काटया रस्त्यावर टाकणारे...

ती फोनवर कुणाशी बोलते?
हरिप्रसाद रामकरण भलावी (35, बेसदेही, जि. बैतुल, मध्य प्रदेश) असे आरोपी पतीचे तर निशा मुन्शी यादव (26) असे पत्नीचे नाव आहे. दोघेही गत काही महिन्यांपासून तालुक्‍यातील तेलगाव येथील नाना खुसपरे यांच्या घरी किरायाने राहतात. मोलमजुरीची कामे करून उदरनिर्वाह करतात. निशाचा हरिप्रसाद सोबतचा हा दुसरा विवाह आहे. गत काही दिवसांपासून निशा कुठल्यातरी व्यक्तीशी मोबाईलवर बोलायची. त्यामुळे पती हरिप्रसादला तिच्यावर संशय येऊ लागला. या संशयातून दोघांमध्ये नेहमीच भांडणे व्हायची. या भांडणाला हरिप्रसाद कंटाळाला होता. घटनेच्या दिवशी 24 एप्रिलच्या रात्री निशा पुन्हा फोनवर बोलताना आढळली. त्यामुळे दाम्पत्यामध्ये भांडण झाले. या भांडणात हरिप्रसादने निशाचा "गेम' करण्याचा निश्‍चय केला अन्‌ मध्यरात्री तीनच्या सुमारास निशा गाढ झोपेत असताना तिच्या डोक्‍यावर मोठा दगड मारला. अचानक झालेल्या जोरदार प्रहारामुळे निशा बेशुद्ध झाली. भीतीमुळे हरिप्रसादला निशाचा मृत्यू झाला असल्याचे वाटले. त्यामुळे आता पोलिस येणार आणि आपल्याला पकडणार, त्यापेक्षा आपणच पोलिसांत जाऊन आत्मसमर्पण करण्याचा त्याने निश्‍चय केला अन्‌ सावनेर पोलिस ठाणे गाठले.

सविस्तर वाचा :  मित्रांनो, निसर्गाशी आतातरी जुळवून घ्या ! निसर्गोपचारक डॉ.बुरंगे यांचा सल्ला

पोलिसही झाले अवाक...
साहेब, मी माझ्या पत्नीला मारले हो, असे त्याने सावनेर पोलिसांना सांगितले. परंतु, तेलगाव हे कळमेश्वर पोलिस ठाण्यांतर्गत येत असल्याने सावनेरचे ठाणेदार अशोक कोळी यांनी ही माहिती कळमेश्वरचे ठाणेदार मारुती मुळूक यांना दिली. घटना मोठी असल्याने मुळूक यांनी पोलिस उपनिरीक्षक मनोज खडसे, लक्ष्मण रुडे, राजकुमार राऊत, तभाणे, गणेश युधमाळी, मन्नान नौरंगाबादे यांच्यासोबत घेऊन घटनास्थळ गाठले. तपासणी केली असता, पोलिस आश्‍चर्यचकित झाले. कारण ज्या आरोपीने पत्नीच्या हत्येसाठी आत्मसमर्पण केले, ती पोलिसांना जिवंतच आढळून आली. परंतु, तिच्या डोक्‍याला जबर मार लागल्याचे पोलिसांना दिसून आले. तिला उपचारार्थ ग्रामीण रुग्णालयात दाखल करण्यात आले.

Vedio :  घरात बोअर झाले तरी "तुम्ही रहावे घरी...मनोरंजन तुमच्या दारी'

सुटून आल्यावर मुलांसह संपविण्याची धमकी
या प्रकरणी कळमेश्वर पोलिसांनी आरोपी हरिप्रसाद रामकरण भलावी याच्याविरोधात गुन्हा नोंद करून आरोपीला अटक केली. आरोपीला जाब विचारण्यासाठी निशाच्या वडिलांनी फोनवरून विचारणा केली असता, आरोपीने आता मी जातो आहे; पण सुटून आल्यावर तिच्यासह मुलांना संपविण्याची धमकी दिली.