नागपूर : पाच जानेवारीला होऊ घातलेल्या महापौर आणि उपमहापौर पदाच्या निवडणुकीसाठी भाजपतर्फे दयाशंकर तिवारी तर उपमहापौरपदासाठी मनीष धावडे यांनी दावेदारी दाखल केली आहे. काँग्रेसमधील गटबाजी कायम असल्याने महापौरपदासाठी रमेश पुणेकर, मनोज गावंडे तर रश्मी धुर्वे आणि मंगला गवरे यांनी उमेदवारी अर्ज भरले.

काँग्रेसचा पराभव निश्चित असला तरी वर्चस्वासाठी शहराध्यक्ष विकास ठाकरे आणि तानाजी वनवे यांनी आपल्या समर्थकांना उभे राहण्यास सांगितले आहे. विशेष म्हणजे भाजपकडे १०८ तर काँग्रेसकडे फक्त २८ नगरसेवक आहेत. महाविकास आघाडीतील शिवसेनेकडे दोन तर राष्ट्रवादीकडे एकच सदस्य आहे.

अधिक वाचा - अति घाई संकटात नेई! शासनाची घाई लोकप्रतिनिधींच्या मुळावर; थेट सरपंच निवडीचा निर्णय रद्द

महाविकास आघाडीकडून नगरसेवक मनोजकुमार गावंडे यांनी महापौर पदासाठी तर उपमहापौर पदासाठी मंगला प्रशांत गवरे यांनी नामनिर्देशन सादर केले. विकास ठाकरे समर्थक रमेश पुणेकर, नगरसेविका रश्मी निलमनी धुर्वे यांनी उपहापौर पदासाठी नामनिर्देशन सादर केले. बहुजन समाज पक्षाकडून नरेंद्र वालदे व उपमहापौर पदासाठी वैशाली नारनवरे यांनी नामनिर्देशन सादर केले.

महाविकास आघाडीतर्फे एकत्रित निवडणूक लढविली जाईल अशी अपेक्षा व्यक्त केली जात होती. मात्र, ठाकरे आणि पालकमंत्री नितीन राऊत समर्थकांनी स्वतंत्रपणे उमेदवारी दाखल केल्याने महाविकास आघाडीत महापालिकेच्या निवडणुकीपूर्वीच फूट पडल्याचे स्पष्ट होते. सुमारे चार वर्षांपासून काँग्रेस गटबाजी सुरू आहे. दोन्ही गट माघार घ्यायला तयार नाही.

जाणून घ्या - जळीतकांडाचा उलगडा : मृत महिलेने सांगितलेला घटनाक्रम पूर्णतः चुकीचा; हे आहे सत्य कराण

प्रदेशाध्यक्षांच्या पत्राकडे दुर्लक्ष

प्रदेशाध्यक्ष बाळासाहेब थोरात यांनी पत्राद्वारे महापौरपदाचा उमेदवार निवडण्यासाठी सर्व नगरसेवक, पदाधिकारी आणि ज्येष्ठ नेत्यांची बैठक घ्यावी अशी सूचना केली होती. शहराध्यक्ष विकास ठाकरे यांना २९ डिसेंबरला पत्रही पाठवले होते. मात्र, पत्राकडे दुर्लक्ष करण्यात आले. परस्पर उमेदवार निश्चित करण्यात आले. तसेच उमेदवारी अर्जसुद्धा दाखल करण्यात आला.

संपादन - नीलेश डाखोरे