नागपूर : निपुत्रीक दाम्पत्यांना हेरून त्यांच्यासाठी मुलांची तस्करी करून विक्री करणाऱ्या टोळीचा गुन्हे शाखेने भंडाफोड केला. सहा जणांच्या टोळीला पोलिसांना अटक केली आहे. या टोळीने साडेतीन लाखांत मुलाची तर अडीच लाखांत मुलींची विक्री केल्याची माहिती समोर आले आहे.
शर्मिला विजय खाकसे (४०, रा. इंदोरा) असे मुख्य आरोपीचे नाव आहे. तिचा पती शिक्षक असल्याचे सांगतो. मात्र, त्याचे मोबाईल साहित्य विक्रीचे दुकान आहे. त्यांना एक मुलगी आहे. शर्मिला अनेक वर्षांपासून या व्यवसायात लिप्त असल्याचा संशय आहे. तिच्या टोळीत शैला मंचलवार (रा. दिघोरी), पूजा पटले (रा. खरबी), लक्ष्मी राणे (रा. सुभाषनगर), मनोरमा ढवळे (रा. पाचपाली) आणि सुरेंद्र पटले (४४, रा. खरबी) यांचा समावेश आहे. या सर्व आरोपींना अटक करण्यात आली आहे.
पोलिसांनी दिलेल्या माहितीनुसार, मानव तस्करीची टोळी शहरात सक्रिय आहे. ते लहान मुलांची खरेदी विक्री करीत असल्याची माहिती समोर आली होती. त्यानुसार पीआय सार्थक नेहेते यांच्या पथकाने तपास सुरू केला आहे. संशयाच्या आधारावर शर्मिला खाकसे हिच्याशी संपर्क साधला. सापळ्यानुसार शर्मिला दोन साथीदारास उंटखाना परिसरात आली. पथकातील पोलिसांनी शर्मिलाशी संपर्क साधला. मुलाची गरज असल्याचे भासविले.
ठरल्याप्रमाणे मुलगा साडेतीन लाखात तर मुलगी अडीच लाखांत विक्री करीत असल्याचे शर्मिलाने सांगितले. मात्र, अजून त्या महिलेची प्रसूती झाली नाही. त्यामुळे तुम्हाला बाळ देऊ शकत नाही असे शर्मिलाने पंटरला सांगितले. पंटरने शर्मिलाच्या हाती पैसे दिले आणि मुलगी घेतली. त्याच वेळी दबा धरून बसलेल्या पथकाने शर्मिला आणि तिच्या दोन साथीदारांना रंगेहात पकडले. तिच्या साथीदारांनाही अटक केली.
शर्मिला टापटीप राहते आणि दुसऱ्यावर प्रभाव पाडते. तिचे काही नातेवाईकही या धंद्यात गुंतले असल्याची शक्यता पोलिसांनी वर्तविली आहे. आतापर्यंत शर्मिलाने ३० पेक्षा अधिक बालकांची विक्री केली असावी. तिने शैला मंचलवारच्या १२ दिवसांच्या मुलाची विक्री केली होती. गरीब दाम्पत्यांना पैशाचे आमिष दाखवून शर्मिला लखपती झाली. त्यामुळे तिचे जाळे अन्य शहरात आहेत काय? याचा तपास पोलिस करीत आहेत.
संपादन - नीलेश डाखोरे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.