गोंदिया : गेल्या  १० वर्षांपासून फरार असलेल्या जहाल नक्षलवाद्याला अटक करण्यात आली आहे. रमेश उर्फ हिडमा मडावी, असे त्याचे नाव असून गोंदिया पोलिसांनी ही कारवाई केली आहे.

हेही वाचा - अमरावती शिक्षक मतदारसंघ निवडणूक : अनिल बोंडे पक्षासाठी प्रयत्न करणार, की बहिणीला दिलेला आशीर्वाद...

रमेश मडावी हा जहाल नक्षलवादी असून, त्याच्यावर जिल्ह्यातील चिचगड, देवरी, डुग्गीपार येथे दाखल असलेल्या विविध गुन्हे दाखल होते. मात्र, तो १० वर्षांपासून फरार होता, अशी गुप्त माहिती अपर पोलिस अधीक्षक अतुल कुलकर्णी यांना मिळाली. दरम्यान, रमेश मडावी हा छत्तीसगड राज्यातील नक्षल अतिसंवेदनशील सुकमा जिल्ह्यात वावरत असल्याचे समजताच अपर पोलिस अधीक्षक कुलकर्णी यांनी पोलिस उपनिरीक्षक अभयसिंह शिंदे व सी-60 पथक देवरीचे पथक तयार केले. सुकमा येथे त्यांना पाठविण्यात आले. तिथे मंगळवारी (ता.10) त्याला अटक करण्यात आली. 

हेही वाचा - अमरावती विभाग शिक्षक मतदारसंघ निवडणूक : महाविकास आघाडीकडून श्रीकांत देशपांडे रिंगणात

रमेश मडावी हा 1998-99 मध्ये नक्षल दलममध्ये भरती झाला होता. त्यानंतर त्याने देवरी दलममध्ये ए.सी.एम. तसेच एल. ओ. एस. कमांडर म्हणून काम केले आहे. देवरी दलममध्ये असताना पोलिस ठाणे चिचगड अंतर्गत मगरडोह हद्दीत पोलिस पथकावर जीवघेणा हल्ला केला होता. खून, हल्ले, सार्वजनिक मालमत्तेची नासधूस असे १० गुन्हे त्याच्यावर दाखल आहेत. देवरी पोलिस ठाण्याच्या हद्दीत 2, डुग्गीपार पोलिस ठाण्याच्या हद्दीत १ असे एकूण १३ गुन्हे दाखल आहेत.