अमरावती : जिल्हा परिषद शाळेत शिकणाऱ्या गरीब, निराधार, गरजू मुलींना शिक्षणासाठी मदत व्हावी या भावनेतून शिक्षकांनी स्वतःच पैसे जमा करून सुरू केलेल्या योजनेला शिक्षण विभागानेच टाचणी लावल्याचा धक्कादायक प्रकार समोर आला आहे. बँकेमध्ये या योजनेसाठी जमा करण्यात आलेले लाखो रुपये तसेच पडून असले, तरी मागील तीन वर्षांपासून एकाही मुलीला या योजनेचा लाभ देण्यात आला नाही. शालेय शिक्षण विभागाने सावित्रीबाई फुले दत्तक पालक योजना सुरू केली. मात्र, प्रशासकीय अनास्थेमुळे मागील तीन वर्षांपासून या योजनेला 'ब्रेक' लागला आहे. यासंदर्भात महाराष्ट्र राज्य प्राथमिक शिक्षक समितीने महिला व बालकल्याणमंत्री यशोमती ठाकूर यांना निवेदन देऊन समस्या सोडविण्याची मागणी केली आहे. 

हेही वाचा - पेट्रोलबरोबर आता साखरही भडकणार; कारखानदारांचा फायदा तर सामान्यांवर बोझा

अमरावती जिल्ह्यात या योजनेसाठी प्राथमिक शिक्षकांनी स्वतः जवळून आणि लोकसहभागातून पैसे गोळा केले. जमा झालेल्या वर्गणीच्या मुदतठेवीतून येणाऱ्या व्याजातून गरजू विद्यार्थिनींना दरवर्षी रोख रक्कम दिली जाते. मात्र, मागील तीन वर्षांपासून या योजनेचे कार्यान्वयन थांबले असून गरीब गरजू मुलींना लाभ दिला जात नसल्याचा आरोप शिक्षक समितीने केला आहे. 

हेही वाचा - बापरे! आयुष्यातील तब्बल पावणे दोन महिने नागरिक घालवतात...

सावित्रीबाई फुले दत्तक पालन योजनेचे अमरावती जि.प. शिक्षक सहकारी बँकेच्या गाडगेनगर शाखेत १९ मुदती ठेव पावत्या असून त्यामध्ये एकूण २५ लाख ४८ हजार १६५ रुपये आहेत. याच सेव्हिंग खात्याला २४ लाख २३ हजार ६१९ रुपये आहेत. असे एकूण ४९ लाख ७१ हजार ७८४ रुपये आहेत. यातून जिल्हा परिषद शाळेत शिकणाऱ्या गरजू, अनाथ मुलींना मदत करण्यात येत होती. पण ही योजना अमरावती जिल्हा परिषदेच्या प्राथमिक शिक्षण विभागाने गुंडाळली. ही योजना शिक्षक व शिक्षणप्रेमी यांच्या लोकसहभागातून तयार करण्यात आली होती. ही योजना पुन्हा सुरू करण्याची मागणी महाराष्ट्र राज्य प्राथमिक शिक्षक समितीचे राज्याध्यक्ष उदय शिंदे, सरचिटणीस विजय कोंबे, गोकुलदास राऊत, राजेश सावरकर आदींनी केली आहे.