चांदूरबाजार ( अमरावती ) : मतदारयादीमध्ये फोटो नसलेल्या व्यक्तींचा वारंवार शोध घेऊनही संबंधित व्यक्ती मिळाली नाही. शेवटी अशा व्यक्तींना नोटीस पाठवून त्यांनी आठ दिवसांत नमुना आठ भरून न दिल्यास त्यांची नावे मतदारयादीमधून वगळण्यात येणार आहे. याबाबत निवडणूक नायब तहसीलदार अर्जुन वांदे यांनी माहिती दिली.

हेही वाचा - मुलांमुळे आई-वडिलांना अनुभवता आला विवाह सोहळा; आयुष्याच्या सायंकाळी दाम्पत्य चढले...

तालुक्‍यात 1 लाख 57 हजार 670 मतदारसंख्या आहे. 1849 मतदारांचे यादीमध्ये फोटोच नाही. अशा मतदारांना यादीत फोटो टाकण्यासाठी त्या परिसरातील बीएलओ यांनी त्यांचा वारंवार शोध घेतला. तसेच निवडणूक विभागाने स्थानिक वृत्तपत्रातसुद्धा जाहिरात देऊन अशा मतदारांचा शोध घेतला. मात्र, अशा मतदारांचा शोध न लागल्याने पुन्हा 1 जानेवारी 2021 च्या अर्हता दिनांकावर आधारित विशेष संक्षिप्त पुनर्निरीक्षण कार्यक्रमांतर्गत दुबार व अनेकविध मतदारांची वगळणी करण्यासाठी अशा मतदारांना पोस्टाने नोटीस पाठवण्यात आली आहे. उपविभागीय अधिकारी संदीपकुमार अपार व तहसीलदार धीरज स्थूल यांच्या मार्गदर्शनात निवडणूक नायब तहसीलदार अर्जुन वांदे यांनी तालुक्‍यात आतापर्यंत ११०० मतदारांना त्यांच्या पत्त्यावर नोटीस पाठविली असून उर्वरित मतदारांनासुद्धा नोटीस पाठवणे सुरू आहे. अशा मतदारांना नोटीस प्राप्त झाल्यापासून आठ दिवसांच्या आत संबंधित नमुना आठ भरून देण्यात यावा, अन्यथा त्यांची मतदार यादीमधून नावे वगळण्यात येणार आहेत. 

हेही वाचा - आपल्या मादीला आकर्षित करण्यासाठी तयार करतात सुंदर घरटं...

मतदारयादीत फोटो नसलेल्या मतदारांना आम्ही पोस्टाने नोटीस पाठवले आहे. नोटीस मिळाल्यापासून आठ दिवसांच्या आतमध्ये त्यांनी नमुना आठ भरून द्यावा, अन्यथा अशा मतदारांची नावे मतदारयादीमधून वगळण्यात येतील.
-अर्जुन वांदे, निवडणूक नायब तहसीलदार.