बेलोरा (जि. अमरावती) : आसेगाव ते फुबगाव मार्गवर पिकअप व्हॅनने विरुद्ध दिशेने येणाऱ्या दोन दुचाकींना जोरदार धडक दिली. या अपघातात दूध व्यावसायिकाचा जागीच मृत्यू झाला तर दोघे गांभीर जखमी झाले. गुरवारी (ता. १७) सकाळी साडेनऊ ते दहा वाजताच्या सुमारास ही घटना घडली.

पोलिसांनी दिलेल्या माहितीनुसार, लालसिंग भादू उईके (वय ३२, रा. डोंगरफाटा, मध्यप्रदेश) हा नेहमीप्रमाणे दूध वाटण्यासाठी आसेगाव ते फुबगाव मार्गवरून दुचाकीने जात होता. शैलेश किंटुकले व अतुल वानखडे (दोघेही रा. फुबगाव) हे एकाच दुचाकीने त्याच मार्गावरून जात होते.

हेही वाचा - चक्‍क देवीसमोर गुडघे टेकले होते कट्टर इस्लाम मानणारा बादशहा औरंगजेबाने! वाचा कुठे आहे मंदिर

त्यांच्या समोर उईके या दूध व्यावसायिकाची दुचाकी होती. दरम्यान, एमएच २७ बीएफ ३२२४ क्रमांकाचे पिकअप व्हॅन विरुद्ध दिशेने आले. भरधाव वाहनाने आधी दूध व्यावसायिकाला जोरदार धडक दिली. नंतर मागे असलेल्या दुसऱ्या दुचाकीला उडविले. या भीषण अपघातात लालसिंग उईके याचा घटनास्थळीच मृत्यू झाला.

दोन दुचाकींना उडविल्यानंतर पिकअप व्हॅन चालकाने वाहन घटनास्थळी सोडून पळ काढला. जवळपास अर्धा तास जखमी घटनास्थळी पडून होते. काही नागिरकांना अपघाताची माहिती मिळताच घटनास्थळी धाव घेतली.

अधिक माहितीसाठी - ‘कौन बनेगा करोडपती’मध्ये तब्बल ५ कोटी जिंकलो आणि आयुष्य झाले खडतर" स्वतःच सांगतोय करोडपती सुशील कुमार..वाचा सविस्तर

यानंतर पोलिसांना अपघताची माहिती दिली. पोलिसांनी घटनास्थळ गाठत जखमींना उपचारासाठी अमरावती जिल्हा सामान्य रुग्णालयात दाखल केले. तसेच आसेगाव पोलिसांनी पसार व्हॅन चालकाविरुद्ध गुन्हा दाखल केला आहे.

संपादन - नीलेश डाखोरे