अमरावती : अमुक एका वस्तूचे सेवन केल्याने कोरोना होत नाही, झाल्यास तो त्वरित दुरुस्त होतो. या वस्तूंमुळे ऑक्‍सिजनचा स्तर वाढतो, अशाप्रकारच्या अनेक आरोग्यमय मॅसेजेसचा सध्या सोशल मीडियावर भडीमार सुरू आहे. विशेष म्हणजे अपवाद वगळता अनेक घरेलू उपचारांना फारसा शास्त्रीय किंवा वैद्यकीय आधार नसतानाही सध्याच्या परिस्थितीत अनेकजण त्याचे तंतोतंत पालन करताना दिसून येतात.

एकूणच आरोग्यमय मॅसेजेसच्या मागे मानसिक कारणे असल्याचे मानसोपचारतज्ज्ञ सांगतात. कोरोनाचा प्रादुर्भाव सुरू झाल्यापासून सोशल मीडियावरून घरगुती उपचारांचे महत्त्व सांगणाऱ्या अनेक टीप्स तसेच व्हिडिओ व्हायरल होत आहेत. सकाळी उठून काय खावे येथपासून ते रात्री झोपतानापर्यंतच्या संपूर्ण क्रिया कशा कराव्यात, याबाबतचे मार्गदर्शन केले जात आहे.

वास्तविक भारतीय संस्कृतीमध्ये घरगुती उपाययोजनांचे एक विशेष स्थान आहे. अनेक उपाय कोरोनापासून बचावासाठी उपयुक्त आहेत, असे विशेषज्ञसुद्धा सांगतात. मात्र बहुतांश वेळा फारसा आधार नसलेले मॅसेजेस व्हायरल होत असतात आणि अनेकजण त्यातील उपाययोजना कसोशीने पाळताना दिसतात. परंतु त्याचा अतिरेक झाल्यास मानसिक आजाराला कारमीभूत ठरू शकतात.

वास्तविक भारतीय घरगुती उपाययोजना प्राचीन काळापासून सुरू आहे. त्यामुळे ती निरुपयोगी आहे असे म्हणता येणार नाही. अनेक घरगुती उपचारांनी जंतूंचा प्रादुर्भाव रोखता येऊ शकतो, हे वेळोवेळी संशोधनांनी सिद्ध झाले आहे. मात्र जेव्हा याचा अतिरेक होतो तेव्हा चिंताविकारामध्ये वाढ होत जाते. प्रत्येकाला जीवन जगावेसे वाटते. त्यामुळे आरोग्यदायी जीवन जगण्यासाठी प्रत्येकजणच धडपडत असतो. त्यात गैर काहीच नाही. केवळ कुठल्याही गोष्टींचा अतिरेक होता कामा नये, याची काळजी घेणे गरजेचे आहे.

-डॉ. अमोल गुल्हाने, मानसोपचारतज्ञ

संपादन - अथर्व महांकाळ