अमरावती : महापालिकेने बांधलेल्या वाचनालयांमधून उच्च शिक्षण घेणारे तसेच स्पर्धापरीक्षेची तयारी करणाऱ्या विद्यार्थ्यांसाठी लवकरच एक सुसज्ज वाचनालय उभारण्याची तयारी सुरू झाली आहे. मनपाच्या महिला व बालकल्याण विभागाने पाचही झोन कार्यालयांतर्गत एक संपूर्ण सोयीसुविधा असलेले वाचनालय तयार करण्याचा  निर्णय घेतला आहे. या प्रस्तावाला प्रशासकीय मंजुरीही देण्यात आली आहे.

हेही वाचा - एकमेकांच्या सोबतीने जीवन जगत असताना पत्नीने साथ सोडली; मग, पतीनेही सोडले प्राण

मनपाद्वारे संचालित वाचनालयांमध्ये अभ्यास करणाऱ्या अनेक विद्यार्थ्यांनी स्पर्धापरीक्षांमध्ये घवघवीत यश मिळवले आहे. ते बघता मनपाकडून विद्यार्थी व स्पर्धापरीक्षेची तयारी करणाऱ्यांसाठी सर्व सोयींयुक्त अद्यावत वाचनालय तयार करण्याचा निर्णय घेतला आहे. त्यामुळे शहरातील गरीब व आर्थिकदृष्ट्या दुर्बल घटकातील विद्यार्थ्यांना परीक्षेची तयारी करणे सुलभ होणार आहे.

हेही वाचा - महापौर संदीप जोशींना कोरोनाची लागण, संपर्कात आलेल्यांना चाचणी करण्याचा सल्ला

सध्या शहरातील बहुतांश विद्यार्थी अमरावती विद्यापीठ, काही खासगी संस्थांद्वारे संचालित वाचनालयांवर अवलंबून आहेत. यापैकी बहुतेक वाचनालये शहरापासून लांब आहेत. त्यामुळे गरीब विद्यार्थ्यांना तेथे जाणेयेणे करणे महागडे ठरते. तसेच विद्यार्थ्यांना वाचनालयांचे शुल्क भरणेही परवडत नाही. ते बघता शहरातील हुशार, होतकरू विद्यार्थ्यांना एकाच ठिकाणी सर्व पुस्तके व सोयी मिळतील याचा विचार करूनच अद्यावत वाचनालय तयार केले जाणार आहे. यात स्पर्धापरीक्षांसह उच्च शिक्षणासाठी आवश्‍यक असलेली सर्व प्रकारची पुस्तके, डिजिटल वाचनालय अशा सुविधा टप्प्याटप्याने निर्माण केल्या जाणार आहेत.    

हेही वाचा -  मदतीच्या बहाण्याने महिलेला बेशुद्ध करून केला अत्याचार...

ग्रंथसंपदा वाढविणार -
महापालिकेच्या वाचनालयांमध्ये मुख्यत्वे स्पर्धा परीक्षेची तयारी करणारे विद्यार्थी अभ्यास करीत असतात. त्यांना वेळेवर जर काही पुस्तकांची आवश्‍यकता भासली तर ती खरेदी करावी लागतात किंवा इतर कोणाकडून मिळवावी लागतात. यात त्यांचा वेळ वाया जातो. ते बघता ग्रंथसंपदा वाढविण्याचा निर्णय महापालिकेने घेतला आहे.