कुंभा ( यवतमाळ ) : हिरव्या आईच्या गर्भात बियाणं रोवून त्याने मोठ्या आशेने स्वप्न पाहिले. पांढरे सोने पिकणार व सारे दुःख हटणार, ही आशा घेऊन तो शेतात राबराब राबला. पण आता बोंडअळी पाहून हादरला व कापसावर तणनाशक फवारून धाय मोकळून रडला. आता खायचे काय? हाच प्रश्न त्याला भेडसावत आहे. ही व्यथा आहे कुंभा येथील तरुण शेतकरी वरूण ठाकरे यांची...
वैदर्भीय शेतकरी कापूस पिकवतो. खरीप पीक म्हणून राबराब राबतो. त्याच्यावर कधी अस्मानी तर कधी सुलतानी संकट येतात. पदवीधर असलेल्या वरूण ठाकरे या 36 वर्षीय तरुण शेतकऱ्याला दोन एकरातील पिकांवर हिंमत होती. दरवर्षी वरूणला पावसाने दगा दिला तरी ओलिताची सोय असल्याने तो हिंमतीने शेती करतो. त्याची पत्नी सोनूने देखील शिक्षण शास्त्रात पदवी मिळविली आहे. ती देखील खांद्याला खांदा लावून बळीराजाचा मनगटाला बळ देते. आई, दोन लहान मुलं व पती, पत्नी असा राजा-राणीचा संसार चालवणार्या वरूणला यावेळेस शेतातील पांढरे सोने पाहून मोठा आनंद झाला. एक लाखांचे कर्ज आपण यंदाच्या पिकावर फेडून टाकू, अशी आशा त्याला होती. ऐनवेळी बोंड अळीच्या जीवघेण्या हल्याने कापूस अन् वरुण दोघेही हादरले. केवळ चार क्विंटल कापूस घरी आल्यानंतर ही बोंड आळी संपूर्ण पीक मातीत घालेल हे कळून चुकले.
आपल्या हाताने पेरणी, मशागत करून लहान बाळासारखे जगलेले कापसाचे पिकावर ट्रॅक्टर फिरवले, तर खायचे काय? असा प्रश्न वरुणसमोर होता. त्यामुळे त्याने दोन एकरातील कापूस पिकावर त्याने तणनाशक फवारले. त्यानेही हातचे पीक वाया गेले. त्यामुळे तो शेतातच धाय मोकलून रडू लागला. आता आम्ही जगायचं कसं? असा प्रश्नही त्याने यावेळी उपस्थित केला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.