अहेरी (जि. गडचिरोली) : ग्रामपंचायत निवडणुकीचे उमेदवार पक्‍के झाले असून त्यांना निवडणूक चिन्हही मिळाले आहे. त्यामुळे आता या निवडणुकीत प्रचाराचा धुरळा उडणार आहे. तशी ही निवडणूक स्थानिक पातळीच्या मुद्यांवर लढली जात असली, तरी मोठ्या राजकीय पक्षांचेही या निवडणुकीतील घडामोडींवर लक्ष आहे. पण, या निवडणुकीच्या अनुषंगाने महाविकास आघाडीत बिघाडी दिसत असून भारतीय जनता पक्षही पिछाडीवरच असल्याचे दिसत आहे.

ग्रामपंचायत निवडणुकीत स्थानिक आघाड्यांमध्ये रस्सीखेच असली तरी आजकाल राजकीय पक्षांचाच प्रभाव अधिक दिसतो. निवडणुकीसाठी वाढलेला खर्च परवडेनासा होत असल्याने उमेदवार राजकीय पक्षांची मदत घेताना दिसतात. पर्यायाने राज्यस्तरावरील राजकारणाचा प्रभाव ग्रामपंचायत स्तरावरही दिसतो. त्यानुरूप गावपातळीवरही युती-आघाडी होते. अहेरी उपविभागात मात्र महाआघाडीत बिघाडी झाल्याचे दिसते. पराकोटीला पोहोचलेल्या द्वेषामुळे महाआघाडीच्या घटक पक्षांचे पदाधिकारी एकमेकांना पाण्यातच पाहताना आढळतात. 

जाणून घ्या -  'तिच्या' घरी सुरु होती लग्नाची लगबग पाहुणेही होते तयार; तेवढ्यात आला फोन अन् एका क्षणात सगळंच संपलं 

ग्रामपंचायत निवडणुकीत घटक पक्षांनी आपापली मोट वेगळी बांधून घेतली आहे. त्यातल्या त्यात आदिवासी विद्यार्थी संघ आणि कॉंग्रेसच्या स्थानिक पदाधिकाऱ्यांमध्येही काही ठिकाणी धुसफूस पाहायला मिळत आहे. येत्या नगरपंचायत निवडणुकीत शिवसेनासुद्धा शड्डू ठोकणार असल्याची चर्चा आहे. नगरपंचायत निवडणुकीत स्वतंत्र अस्तित्व दाखवणे आवश्‍यक असल्याचे नेत्यांना वाटत आहे. त्यामुळे या निवडणुकीत शिवसेना पदाधिकारी सक्रिय होताना दिसत आहेत. 

भाजपकडे मात्र वेगळीच परिस्थिती आहे. माजी राज्यमंत्री अम्ब्रीशराव यांच्या नाराजीचा फटका भाजपला बसताना दिसत आहे. मुळातच ग्रामीण भागात फारसा प्रभाव नसलेला भाजप निवडणुकीच्या आधीच माघारलेला दिसत आहे. मात्र आगामी नगरपंचायत निवडणुका भाजप प्रतिष्ठेची करणार असल्याचे चिन्ह दिसत आहे. सध्या तरी कोणत्याही पक्षाचा मोठा नेता या ग्रामपंचायत निवडणुकीत प्रकर्षाने सक्रिय होताना दिसून येत नसला, तरी पडद्यामागून राजकीय डावपेच सुरू झाले आहेत. जिल्ह्यातील आमदारांनी बिनविरोध निवडणुकीसाठी प्रोत्साहन निधी देण्याचे आश्‍वासन देत या निवडणुकांवर प्रभाव पाडण्याचा प्रयत्न केला आहे. 

त्यातूनच अनेक पक्ष आपल्या प्रभावातील अधिकाधिक ग्रामपंचायती बिनविरोध करून आपल्या खिशात घालण्यासाठी धडपडत आहेत. एकीकडे आम्ही या खेळात नाहीच असे वरवर भासवत दुसरीकडे अधिकाधिक ग्रामपंचायतींवर आपलाच झेंडा रोवायचा किंवा निवडणूक झाल्यावर विजेत्यांना आपल्या गोटात घेऊन त्यांच्या हातात आपला झेंडा द्यायचा, असे प्रयत्न सुरू आहेत.

नक्की वाचा - अनेक दिवसांपासून बंद असलेल्या घराचं शेजाऱ्यांनी उघडलं दार; पलंगाजवळील दृश्य बघून भल्याभल्यांचा उडाला थरकाप 

रंगीत तालीम

सध्या ग्रामपंचायत निवडणूक असली, तरी त्यानंतर लवकरच नगरपंचायतीच्या निवडणुकाही आहेत. त्यामुळे अहेरीतील राजकीय पक्षांसाठी ही निवडणूक रंगीत तालिम ठरणार आहे. नगरपंचायतीची निवडणूक शहरी भागात होत असली, तरी एकदा "इलेक्‍शन मोड' मध्ये आलेले पदाधिकारी, कार्यकर्ते अधिक जोमाने कार्य करतात. शिवाय नियोजन, रणनीती, जनसंपर्क, संघटन मजबूती, मोर्चेबांधणी याचाही सराव होत असल्याने यादृष्टीनेही ग्रामपंचायत निवडणुकीकडे पाहिले जात आहे.

संपादन - अथर्व महांकाळ