अमरावती : कापूस खरेदीची जिल्ह्यात पाच शासकीय केंद्र सुरू झाली असली तरी आतापर्यंत केवळ २,४०० क्विंटल कापूस खरेदी होऊ शकला आहे. टप्प्याटप्प्याने ही केंद्र सुरू झाली आहे. खासगी केंद्रांवरही कापसाची आवक फार मोठ्या प्रमाणात नसल्याने यंदा कापसाची बाजारपेठ फुलण्याची शक्‍यता कमी असल्याचे मत या क्षेत्रातील जाणकारांनी व्यक्त केले आहे.

अमरावतीसह अचलपूर, मोर्शी, वरूड व दर्यापूर येथे शासकीय खरेदी केंद्र गेल्या आठ दिवसांत सुरू झाली आहेत. एक डिसेंबरला सर्वांत अखेरचे अचलपूर येथील केंद्राचा शुभारंभ झाला. अमरावतीच्या कामूंजा येथील शेतकरी सहकारी जिनिंग प्रेसिंगमध्ये १२५ क्विंटल ६० किलो, दर्यापूरच्या सदगुरू जिनिंगमध्ये १,२५४ क्विंटल ३४ किलो, मोर्शी केंद्रावर ६२.६५ क्विंटल, वरूड येथील केंद्रावर २२५.७५ क्विंटल व अचलपूर येथील केंद्रावर १२४.१० क्विंटल कापसाची आवक झाली आहे.

सविस्तर वाचा - विजय वडेट्टीवार यांच ‘एक तीर दो निशान’; उदयनराजेंच्या निमित्ताने फडणवीसांना हाणला टोला

हमीदराने हा कापूस खरेदी करण्यात आला असून, आतापर्यंत १३ कोटी ६८ लाख रुपयांची खरेदी झाली आहे. कापसाला ५,२७५ रुपये प्रती क्विंटल हमीदर आहे. यंदा गतवर्षीसारखा हंगाम राहणार नसल्याची शक्‍यता आहे.

खरीप हंगामातील शेतकऱ्यांच्या नगदी पिकांवर अतिपाऊस व नंतर बोंडअळी, बोंडसरीने आक्रमण केल्याने नुकसान केले आहे. पाच फुटापर्यंत उंची गाठणाऱ्या कापसाच्या पिकावरील बोंड गळलेत.

परिणामी उत्पादनाची सरासरी घसरण्यासोबतच प्रतही घसरली. कापसाच्या आवकीचा उच्चांक गाठणाऱ्या कालावधीत केंद्रावर कापूस घेऊन येणाऱ्या शेतकऱ्यांची प्रतीक्षा करण्याची वेळ आली आहे.

अधिक वाचा - अमरावतीतील बाळाचे मृत्यूप्रकरण : आईला तीन दिवसांची पोलिस कोठडी; नव्याने नोंदविले जाईल बयाण

एफएक्‍यू, एलआरए दर्जाचाच कापसाची खरेदी

शासकीय केंद्रावर सीसीआयच्या निकषांप्रमाणे केवळ एफएक्‍यूव एलआरए दर्जाच्या कापसाची खरेदीला केली जाते. या प्रतीच्या कापसातूनच अपेक्षित उतारा मिळत असल्याचा दावा असल्याने दुय्यम दर्जाचा नाकारला जातो. यंदा अतिपावसामुळे उत्पादन घसरण्यासोबतच प्रतही खालावली आहे. मात्र, तो नाकारण्याइतकी प्रत खालावली नसल्याचा शेतकऱ्यांचा दावा आहे. तो दुय्यम दर्जाचा कापूस एलआरए २ अशी श्रेणी करून खरेदी करावा अशी मागणी आहे.

संपादन - नीलेश डाखोरे