यवतमाळ : नोकरीचे आमिष दाखवून तरुणीची देहविक्रय व्यवसायासाठी उत्तर प्रदेशातील बनारस येथे विक्री केल्याचा धक्कादायक प्रकार उघडकीस आला आहे. या प्रकरणी ग्रामीण पोलिस ठाण्यात गुन्हा नोंदविण्यात आला. प्रकाश दिलीप काळे (वय 26, रा. ब्राम्हणी), राजू पटेल (वय 34, रा. रामपूर, बनारस) अशी संशयितांची नावे आहेत. प्रकाश काळे यांनी एका तरुणीला नोकरीचे आमिष दाखवून रामपूर येथे नेले व विनयभंग केला. रामपूर येथील राजू पटेल यास अवैध व्यवसायासाठी विक्री केली. शिवाय त्याने पीडितेची फसवणूक करून अत्याचार केला. ही घटना 1 फेब्रुवारी ते 21 एप्रिल 2019 या कालावधीत घडली. तरुणीने त्याच्या तावडीतून कशीबशी सुटका करून ग्रामीण पोलिस ठाणे गाठले. पोलिसांत दिलेल्या तक्रारीवरून दोघांविरुद्ध गुन्हा नोंदविण्यात आला. वणी येथील देहविक्रय व्यवसायात अशाच प्रकारे नोकरीचे आमिष दाखवून मुलींची विक्री करण्यात आल्याचा प्रकार यापूर्वी उघडकीस आला होता. गरजू मुलींना हेरून त्यांना विश्‍वासात घेतले जाते. देहविक्रय अड्ड्यावर नेऊन विक्री करण्यात येते. यात रॅकेटच सक्रिय असल्याची शंका उपस्थित होत आहे.