गोरेगाव (जि. गोंदिया) : गोरेगाव वनबिटात येणाऱ्या जानाटोलालगतच्या वनात वाघाचे बस्तान असल्याची भीती शेतकऱ्यांमध्ये आहे. ‘वाघ आला रे, आला, पळापळा’ असा टाहो ऐकावयास येताच क्षणात शेतकरी, महिला कामे सोडून गावात येत आहेत. असे दृश्य मंगळवारी (ता. २७) वनपरिक्षेत्राधिकारी, वनविभागाची चमू आणि गावकरी यांच्या जानाटोला या गावात झालेल्या गर्दीवरून निदर्शनास आले. (Tiger-News-Tiger-terror-in-Gondia-Fear-among-citizens-nad86)

भंडगा, कन्हारटोला, पिंडकेपार, रेल्वेटोली, जानाटोला, चंद्रपूरटोली येथील शेतकरी, शेतमजूर जीव मुठीत धरून शेतीचे कामे करीत आहेत. वनविभागाने नागरिकांच्या व वाघाच्या रक्षणासाठी प्रत्येक संशयास्पद ठिकाणी एक संपर्क पॉइंट तयार केला असून, एका चमूत तीन वनकर्मचारी तैनात केले आहेत. जानाटोला येथील श्यामा सोनटक्के यांच्यावर वाघाने हल्ला केला होता. सहकारी व्यक्तींच्या मदतीने वाघाला पळवून लावल्याने त्यांचा जीव वाचला होता. मात्र, भंडगा येथील पूना मेश्राम यांना वाघाने हल्ला करून ठार केल्याने परिसरात दहशत निर्माण झाली आहे.

पूना मेश्राम यांचा बळी गेल्यानंतर वनविभागाच्या वतीने संपर्क प्वाइंट तयार करण्यात आला व जनजागृती करण्याचे काम सुरू झाले. असे असले तरी वनालगत शेती असलेल्या शेतकऱ्यांना भातपिकाची रोवणी करण्यासाठी जावे लागत आहे. या परिसरात वाघाचे बस्तान असल्याने वाघाची भीती आहे. एखाद्याने वाघ त्या भागात दिसला, अशी अफवा पसरवताच जिवाच्या भीतीने शेतकरी शेतीची कामे सोडून गावाकडे परत येत आहेत.

यापूर्वी वाघाने दोन्ही हल्ले जानाटोला, कन्हारटोला, बल्लारशाह गोंदिया रेल्वे मार्गाच्या परिसरात केले आहेत. त्यामुळे वनपरिक्षेत्राधिकारी प्रवीण साठवणे यांनी वन गस्त चमू तयार केली आहे. ही चमू गस्त लावण्याचे काम करीत आहे. चंद्रपूरटोली, जानाटोला, कन्हारटोला, गराडा जंगल परिसरात संपर्क प्वाइंट तयार करण्यात आले आहेत.

(Tiger-News-Tiger-terror-in-Gondia-Fear-among-citizens-nad86)