वणी (जि. यवतमाळ) : झरी तालुक्‍यातील बोपापूर येथील ३५ वर्षीय विवाहितेवर ‘तुझ्या मुलाला मारून टाकेल’ अशी धमकी देऊन अत्याचार केला. पोलिसांनी विवाहितेच्या तक्रारीवरून आरोपी कृषीकेंद्र चालकाला अटक केली आहे.

पोलिसांनी दिलेल्या माहितीनुसार, विवाहिता बोपापूर येथे आपल्या परिवारासह राहते. विवाहितेचा सात वर्षांचा मुलगा वणी येथील एका शाळेत शिक्षण घेत असल्याने त्याला महिलेने वणी येथे असलेल्या आईजवळ ठेवले होते. मुलाला भेटण्यासाठी ती वणी येथे येत होती. विराणी टॉकीज परिसरात असलेल्या कृषी केंद्राचा चालक संजय पिंपळकर (वय ३५) हा महिलेच्या पतीचा मित्र असल्याने त्याच्यासोबत महिलेची ओळख होती.

अधिक माहितीसाठी - ‘आई तुझ्याशी शेवटचे बोलायचे... मृत्यूला कवटाळण्यापूर्वी तुझा आवाज मला ऐकायचा आहे...’

फेब्रुवारी २०२० मध्ये ती मुलाला भेटण्यासाठी वणी येथे आली असता संजय पिंपळकर याने तिला फोन केला व विवेकानंद शाळेजवळ भेटण्यास बोलावले. ‘जर तू आली नाही तर तुझ्या मुलाला मारून टाकीन’, अशी धमकी दिली. त्यामुळे ती त्याला भेटण्यासाठी गेली. त्याने तिला दुचाकीवर बसवून वरोरा येथील एका हॉटेलमध्ये नेले व अत्याचार केला. त्यानंतर त्याने वारंवार धमकी देऊन तिच्यावर अत्याचार केला.

विवाहितेने ही घटना घरी तिच्या पतीला सांगितली व वणी पोलिसांत तक्रार दाखल केली. प्राप्त तक्रारीवरून वणी पोलिसांनी संजय पिंपळकर याला अटक केली. पुढील तपास पोलिस उपनिरीक्षक माया चाटसे करीत आहे.

जाणून घ्या - उपराजधानीत पुन्हा कोरोनाचा उद्रेक; आजची रुग्णसंख्या बघून सरकेल पायाखालची जमीन

शेतकऱ्याची गळफास लावून आत्महत्या

कर्जबाजारीपणा व नापिकीला कंटाळून महागाव येथून जवळच असलेल्या कलगाव येथील शेतकऱ्याने शेतातील सागाच्या झाडाला गळफास घेऊन आत्महत्या केली. माधव चंपत नजरधने (वय ५३) असे आत्महत्या केलेल्या शेतकऱ्याचे नाव आहे. माधव मागील काही दिवसांपासून आर्थिक विवंचनेत जीवन जगत होते. दोन मुलींचे विवाह झाले, तर एका मुलीचा विवाह व्हायचा आहे. तीन मुलींसह पत्नी व मुलगा असा परिवार त्यांच्यामागे आहे. केवळ तीन एकर शेतीच्या उत्पादनावर त्यांच्या कुटुंबाची उपजीविका चालत असे.