अचलपूर (जि. अमरावती) : उन्हाळा जेमतेम सुरू झाला. अशातच मेळघाटात पाणीटंचाईने डोके वर काढले आहे. सध्या मेळघाटमधील बहुतांशी गावांमध्ये भीषण पाणीटंचाई निर्माण झाली आहे. दरवर्षी प्रशासनाकडून कायमस्वरूपी उपाययोजना न करता तात्पुरत्या स्वरूपाच्या योजना राबविण्यात येत असल्याने आदिवासी बांधवांना डोंगरदऱ्यांमध्ये पाण्यासाठी भटकंती करावी लागत आहे.

हेही वाचा - रात्रंदिवस राबून जोपासलं पीक अन् पशूधन, पण एक ठिणगी पडली अन् सर्वच संपलं

उन्हाळा सुरू होताच मेळघाटातील एकझिरा गावासह बहुतांश गावांत पाणीटंचाई निर्माण झाली आहे. यावर्षी जेमतेम उन्हाळा सुरू होताच पाणीटंचाईने डोके वर काढले. चिखलदरा तालुक्‍यात चंद्रभागा आणि शहानूर ही दोन धरणे आहेत. यापैकी चंद्रभागा धरणातून अचलपूर, परतवाडा तर शहानूर धरणातून अंजनगाव, दर्यापूर, मूर्तिजापूर या शहरांना पाणीपुरवठा केला जातो. मात्र, ज्या तालुक्‍यात धरण आहे तेथील जनता मात्र पाण्यासाठी लाहीलाही होताना दिसून येत आहे. ज्या जनतेच्या जमिनी या धरणात गेल्या ती जनता मात्र पाण्यासाठी वणवण भटकंती करते. मेळघाटात दरवर्षी चांगला पाऊस पडतो, तरीसुद्धा मेळघाटला पाणीटंचाईचा सामना करावा लागतो. या पाणीटंचाईवर लाखो रुपयांचा खर्च केला जातो. परंतु, प्रशासन कायमस्वरूपी तोडगा काढण्यास तयार नाही. कायमस्वरूपी तोडगा काढल्यास दरवर्षी आर्थिक फायदा होणार नाही, यासाठी तर तोडगा काढत नाही ना? असा प्रश्‍न उपस्थित होत आहे. दरवर्षी मेळघाटात मोठ्या प्रमाणात टँकर सुरू करण्यात येते. त्यावर खर्चसुद्धा करण्यात येतो. त्यानंतर परिस्थिती जैसे थे होते. प्रशासनाने आजचा विचार करण्यापेक्षा कायमस्वरूपी तोडगा कसा निघेल, यावर मंथन करावे, असे आदिवासी बांधवांचे म्हणणे आहे. 

हेही वाचा - कर्तुत्वाला सलाम! ७८ वर्षांचा कोरोनायोद्धा उतरला...

कायमचा तोडगा शक्‍य -
चिखलदरा तालुक्‍यातील चंद्रभागा व शहानूर या दोन्ही धरणांवरून चार ते पाच शहरांना पाणीपुरवठा केला जातो, तर मेळघाटातील गावांना या धरणांवरून पाणीपुरवठा करण्यास अडचण काय? असा प्रश्‍न उपस्थित होत आहे. ज्या तालुक्‍यात धरणे आहेत त्या तालुक्‍यातील जनता पाण्याविना अन्‌ ज्यांच्या जमिनी गेल्या नाहीत त्यांना पाणीपुरवठा होतो, हे आश्‍चर्यच आहे. यावर उपाय म्हणून मेळघाटातील ज्या गावांत दरवर्षी पाणीटंचाई निर्माण होते, अशा गावांसाठी कायमस्वरूपी पाइपलाइन टाकल्यास पाणीटंचाईला आळा बसू शकतो, असे नागरिकांचे म्हणणे आहे.