SBI, HDFC बँकेच्या FD व्याजदरात वाढ; जाणून घ्या कारण!

देशातील अनेक बॅंकांनी (Bank)मुदत ठेव म्हणजेच एफडीदर वाढविला आहे. रिझर्व्ह बॅंक ऑफ इंडियाने (RBI) पॉलिसी दर स्थिर ठेवण्याचा निर्णय घेतल्यानंतर स्टेट बँक ऑफ इंडिया (SBI) आणि HDFC बँकेने FD वरील व्याजदरात वाढ केली आहे.

एसबीआय एफडी रेट्स ( १५ फेब्रुवारी २०२२ पासून प्रभावी)- स्टेट बँक ऑफ इंडियाचे सुधारित व्याजदर १५ फेब्रुवारी २०२२ पासून लागू आहेत. एसबीआयने २ वर्षांपेक्षा जास्त कालावधीसाठी एफडीवर व्याजदर वाढवले आहेत. पुढील २ ते ३ वर्षांसाठी व्याजदर ५.१० टक्क्यांवरून ५.२० टक्के करण्यात आले आहेत. तर २ ते ५ वर्षांच्या एफडीवरील दर हे १५ बेसिक अंकांनी वाढवून ५.४५ टक्के ठेवले आहेत. तर ५ ते १० वर्षांच्या मुदतीच्या FD ठेवींसाठी व्याजदर ५.५० टक्के करण्यात आले आहेत.

एचडीएफसी बॅंक एफडी रेट्स (१४ फेब्रुवारी २०२२ पासून प्रभावी) - अलिकडेच, एचडीएफसी बॅंकेने एक वर्षांच्या मुदतीच्या एफडीवरील व्याजदर १० बेस पॉइंट्सवरून ५ टक्के केला आहे. तर ३ ते ५ वर्षांच्या मुदतीच्या ठेवींवरील दर ५ बेस पॉइंट्सने वाढवून 5.45 टक्के केले आहेत. HDFC बँकेचे सुधारित व्याजदर 14 फेब्रुवारी 2022 पासून लागू आहेत.

सेंट्रल बॅक ऑफ इंडिया आणि युको बॅंकेनेही वाढवले व्याज दर - सेंट्रल बॅंक ऑफ इंडिया (Central Bank of India) आणि युको बॅंकेने (UCO Bank) आरबीआय एमपीसीने रेपो आणि रिव्हर्स रेपो दर स्थिर ठेवण्याची घोषणा केल्यानंतर फिक्स्ड डिपॉझिटवरील व्याजदरात सुधारणा करण्यात आली आहे. आता या दोन्ही बँकांचे नवे व्याजदर १० फेब्रुवारी २०२२ पासून लागू झाले आहेत.

महागाई दर वाढला - तज्ज्ञांच्या मते, बँकांनी एफडी दर वाढवण्याची घोषणा केली आहे. कारण भारतातील महागाई दर वाढले आहेत. मिंट रिपोर्टमध्ये जीसीएल सिक्युरिटीजचे रवी सिंघल यांनी सांगितले, की व्याजदरावर परिणाम करणाऱ्या प्रमुख घटकांपैकी महागाई हा एक महत्त्वाचा घटक आहे. महागाईचा दर जितका जास्त तितका व्याजदर वाढण्याची शक्यता जास्त असते. भारतातील महागाई दर उच्च पातळीवर वाढत असल्याने, अनेक बँका एफडी दर वाढवत आहेत.