Jalgaon News | नाशिक पदवीधर संघाची 30 जानेवारीस निवडणूक : जिल्हाधिकारी अमन मित्तल

जळगाव : नाशिक पदवीधर मतदारसंघाची निवडणूक ३० जानेवारी २०२३ ला होणार आहे. त्याची प्रक्रिया येत्या ५ जानेवारीपासून सुरू करण्यात येणार आहे, अशी माहिती जिल्हाधिकारी तथा जिल्हा निवडणूक अधिकारी अमन मित्तल यांनी शुक्रवारी (ता. ३०) पत्रकार परिषदेत दिली. निवडणूक उपजिल्हाधिकारी तुकाराम हुलवळे या वेळी उपस्थित होते.

नाशिक विभाग पदवीधर मतदारसंघाच्या निवडणुकीचे निवडणूक निर्णय अधिकारी नाशिक विभागीय आयुक्त राधाकृष्ण गमे असतील. निवडणुकीच्या प्रक्रियेला ५ जानेवारीपासून नाशिकला सुरवात होईल. (Collector Aman Mittal Election of Nashik Graduate Union on January 30 Jalgaon News)

हेही वाचा : जोखमीचे भान राखूनच करा SIP मध्ये गुंतवणूक

यात ५ ते १२ जानेवारीदरम्यान अर्ज दाखल करणे, १३ जानेवारीस अर्जांची छाननी होईल. १६ ला अर्ज माघारीचा दिवस आहे. ३० जानेवारीस सकाळी आठ ते दुपारी चारदरम्यान मतदानाची वेळ आहे. २ फेब्रुवारीस मतमोजणी होईल.

मतदानासाठी जळगाव जिल्ह्यात एकूण ४० केंद्रे आहेत. पदवीधर मतदारसंख्या ३३ हजार ५४४ आहे. अमळनेर तालुक्यात तीन केंद्रे, चोपडा तालुक्यात चार, यावलला दोन, रावेरला तीन, मुक्ताईनगर, बोदवडला प्रत्येकी एक केंद्र असेल.

भुसावळला तीन, जळगावला सहा, धरणगावला एक, एरंडोल, पारोळा, भडगाव, पाचोरा येथे प्रत्येकी दोन मतदान केंद्रे असतील. चाळीसगाव व जामनेरला प्रत्येकी चार मतदान केंद्रे असतील. मतदान केंद्राबाबत काही हरकती असल्यास त्यावर ५ जानेवारीपर्यंत हरकती दाखल करण्यात येतील. या निवडणुकीची आचारसंहिता लागू करण्यात आली आहे.