पृथ्वीराज चौहान राजपूत की गुर्जर राजा? अक्षयचा 'पृथ्वीराज' सापडला वादात

गेल्या काही दिवसांपासून अक्षय कुमार(Akshay Kumar) मुख्य भूमिका करीत असलेला 'पृथ्वीराज'(Prithviraj) सिनेमा अनेक कारणांमुळे चर्चेत आहे. या सिनेमाचा ट्रेलर रिलीज झाला आहे. आणि सिनेमा पुढील महिन्यात ३ जून रोजी प्रदर्शित होत आहे. भारतातील शेवटचे हिंदू राजा पृथ्वीराज चौहान यांच्यावर बनलेला हा सिनेमा आता प्रदर्शनाआधीच वादात सापडला आहे. या सिनेमावर गुर्जर समाजाच्या संघटनेनं आक्षेप घेतला आहे. संघटनेचा दावा आहे की, १२ व्या दशकात होऊन गेलेले महाराज पृथ्वीराज चौहान हे राजपूत नसून गुर्जर समाजाचे होते. संघटनेनं मागणी केली आहे की सिनेमात पृथ्वीराज चौहान हे गुर्जर राजा होते असा उल्लेख करावा.

पृथ्वीराज चौहान यांचं साम्राज्य उत्तर भारत आणि राजस्थानमध्ये पसरलं होतं. त्यांच्या राज्याची राजधानी अजमेर होती. आता अखिल भारतीय वीर गुर्जर समाजानं दावा केला आहे की,पृथ्वीराज चौहान हे गुर्जर राजा होते. संघटनेचे मुख्य वीरेंद्र विक्रेम यांच्या म्हणण्यानुसार पृथ्वीराज रास भाग १ मध्ये पृथ्वीराज चौहान यांचे वडील सोमेश्वर यांचा गुर्जर म्हणून उल्लेख करण्यात आला आहे. ते म्हणाले,''असे कितीतरी ऐतिहासिक दाखले आहेत ज्यावरुन स्पष्ट होईल की पृथ्वीराज गुर्जर होते. याच दाखल्यांच्या आधारावर सिनेमाच्या निर्मात्यांकडे आमची मागणी आहे की,'पृथ्वीराज' या सिनेमात राजा पृथ्वीराज हे राजपूत नाही तर गुर्जर राजा होते असा उल्लेख व्हावा''.

गुर्जर संघटनेचे राज्याध्यक्ष मनीष भारगद यांनी म्हटलं आहे की,'' त्यांच्या संघटनेनं गेल्या वर्षी यासंदर्भात सिनेमाच्या निर्मात्यांची भेट घेतली होती. आणि त्यांच्यासमोर यासंदर्भातले अनेक ऐतिहासिक पुरावे सादर केले होते. आणि याच भेटीत सिनेमात योग्य प्रकारे राजा पृथ्वीराज यांचा उल्लेख व्हावा अशी मागणीही केली होती. त्यावेळी आम्हाला निर्मात्यांनी योग्य बदल केले जातील असं आश्वासन दिलं होतं. आमच्या गुर्जर समाजाविरोधात कुठलाही उल्लेख नसेल असे सांगून आम्हाला आश्वस्त केलं होतं. आता सिनेमा प्रदर्शित होतोय म्हणून आम्ही पुन्हा निर्मात्यांना आमच्या मागणीची आठवण करून देत आहोत. आणि जर आमच्या मागणीनुसार सिनेमात बदल कले नसतील तर सिनेमा प्रदर्शित होण्यावर आमचा आक्षेप आहे''. यासंदर्भात अद्याप राजपूत समाजानं आपली बाजू समोर आणलेली नाही.

अक्षय कुमार व्यतिरिक्त 'पृथ्वीराज' या सिनेमात संजय दत्त,सौनू सूद, आशुतोष राणा आणि मानव विज असे अनेक कलाकार महत्त्वाच्या भूमिकेत आहेत. या सिनेमातून माजी मिस वर्ल्ड मानुषी छिल्लर बॉलीवूडमध्ये पदार्पण करीत आहे. 'पृथ्वीराज/ सिनेमाचं दिग्दर्शन डॉ.चंद्रप्रकाश द्विवेदी यांनी केलं आहे.