Tunisha Sharma Death: मालिका,चित्रपट सगळं काही मिळालं, मग आत्महत्या का?, पोलिसांना मिळाली तपासाची दिशा..

Tunisha Sharma Death: टी.व्ही अभिनेत्री तुनिषा शर्मा हिनं शनिवारी आपली टी.व्ही मालिका 'अली बाबा दास्तां ऐ काबुल' च्या सेटवर आत्महत्या केली. तुनिषानं आत्महत्या का केली याचं कारण अद्याप समोर आलेलं नसलं,तरी मालिकेच्या सेटवर कसून चौकशी केल्यानंतर पोलिसांच्या हाती काही महत्त्वाचे मुद्दे लागले आहेत,ज्यानं तपासाची दिशा ठरवता येईल. तुनिषानं खरंच आत्महत्या केली की तिची हत्या झाली आहे यादिशेनं देखील पोलिसांनी तपास सुरू केला आहे. (Tv Actress Tunisha Sharma Death, Reason behind that..)

केवळ २० वर्ष वयाची तुनिषा शर्मानं खूप कमी वेळात यश मिळवलं होतं. तुनिषानं अगदी कमी वयात ६ हून अधिक मालिका आणि ३ मोठ्या सिनेमात अभिनय केला होता. कमी वयात तिच्या वाट्याला प्रसिद्धी आली होती त्यामुळे तिच्या निधनाच्या बातमीनं सगळेच हैराण झालेयत. तुनिषानं शनिवारी आत्महत्येच्या काही तास आधीच मेकअप रुममध्ये शूट केलेला व्हिडीओ स्टेट्स ला ठेवला होता. आणि त्यानंतर काही तासातच तिनं आत्महत्या केल्याची बातमी समोर आली.

तुनिा शर्मानं ६ हून अधिक मालिकांमध्ये काम केलं होतं. सध्या तुनिषा 'अली बाबा दास्तां ऐ काबूल' मध्ये मुख्य भूमिका साकारत होती. यासोबतच तुनिषा शर्मानं 'चक्रवर्ती अशोक सम्राट','गुब्बर पूंछवाला','भारत का वीर पुत्र- महाराणा प्रताप',' इंटरनेट वाला लव' आणि 'इस्क सुभानअल्लाह' सारख्या मालिकांमध्ये काम केलं आहे.

इतकंच नाही तर तुनिषानं सिनेमांमधूनही आपल्या दमदार अभिनयाची झलक दाखवली आहे. तुनिषानं कतरिना कैफच्या 'फितूर' सिनेमात तिच्या लहानपणीची भूमिका साकारली होती. तिच्या या भूमिकेचे कौतूकही झाले होते. तसंच,कतरिनाच्याच 'बार बार देखो' सिनेमात पुन्हा तिनं तिच्या लहानपणीची भूमिका साकारली होती. तुनिषानं 'कहानी २' मध्ये देखील आपल्या अभिनयाचा जलवा दाखवला होता.

तुनिषा सध्या कुठल्यातरी टेन्शनमध्ये होती अशी माहिती मालिकेच्या सेटवर चौकशी केल्यानंतर समोर आली आहे. पण त्या टेन्शनचं कारण मात्र समजलेलं नाही. तुनिषाच्या निधनाच्या बातमीनं टी.व्ही जगत नाही तर सिने जगतातही खळबळ उडाली आहे. केवळ २० वर्ष वयात इतकं यश,पैसा मिळूनही गळ्याला फास लावण्याचा विचार तुनिषाच्या मनात का आला याचाच विचार सगळे करत आहेत. पोलिस सध्या तपास करत आहेत. कदाचित लवकरच तुनिषाच्या आत्महत्येचं कारण समोर येईल.