Mumbai News: भाईंदरच्या स्थानकात रेल्वेखाली येऊन बाप-लेकानी संपवलं जीवन

सोमवारी सकाळी १०.३० वाजता भाईंदर स्थानकाच्या प्लॅटफॉर्म क्रमांक ६ वर दोन जणांनी रेल्वेच्या खाली येऊन आत्महत्या केली. हे दोघे वसईमध्ये राहणारे पिता-पुत्र होते. वडील हरिश मेहता (६० वर्षे) आणि मुलगा जय मेहता (३५ वर्षे) असे मृतांची ओळख पटली आहे. नालासोपारा येथील रहिवासी असलेल्या या बाप-लेकाच्या अचानकपणे घेतलेल्या या निर्णयामुळे स्थानकात खळबळ उडाली.

आत्महत्येची कारणे अद्याप अस्पष्ट-

भाईंदर स्थानकावरून चर्चगेटच्या दिशेने जाणाऱ्या ट्रेनसमोर उडी मारून या दोघांनी आपले जीवन संपवले. घटनास्थळी दाखल झालेल्या रेल्वे पोलिसांनी मृतदेह ताब्यात घेतले आणि शवविच्छेदनासाठी रुग्णालयात पाठवले. आत्महत्येचे कारण अद्याप अस्पष्ट असून, वसई रेल्वे पोलिस या घटनेचा तपास करत आहेत.

सीसीटीव्ही फूटेजद्वारे माहिती-

घटनेचे सीसीटीव्ही फूटेज उपलब्ध झाले असून, त्यात बाप-लेक स्थानकाच्या फलाटावरून चालत जाताना आणि समोरून येणाऱ्या लोकलखाली झोपताना दिसतात. व्हिडिओमध्ये वडील आणि मुलगा रेल्वेच्या रुळावर झोपलेले स्पष्ट दिसत आहे. अचानक धावत्या लोकलसमोर आल्यामुळे लोकल चालकाने थांबवण्याचा खूप प्रयत्न केला, परंतु तो असफल ठरला आणि लोकल दोघांच्या अंगावरून गेली.

पुढील तपास सुरू

या प्रकरणी वसई पोलिसात नोंद झाली असून, पुढील तपास सुरू आहे. दोघांकडे सुसाइड नोटही आढळलेली नाही. स्थानिक प्रशासन आणि पोलिस अधिक तपशील शोधत आहेत, जेणेकरून आत्महत्येचे कारण स्पष्ट होऊ शकेल.