Sajjangad Fort : छत्रपती शिवरायांचा जयघोष अन् फटाक्यांची आतषबाजी; धगधगत्या मशालींनी किल्ले सज्जनगड उजळला

-अमर वांगडे

परळी (सातारा) : 'छत्रपती शिवाजी महाराज (Chhatrapati Shivaji Maharaj) की जय, धर्मवीर छत्रपती संभाजी महाराज की जय'च्या घोषात, तसेच फटाक्यांच्या आतषबाजीत अवघा आसमंत उजाळला होता. या शिवाय, शेकडो धगधगत्या मशालींनी सज्जनगड तेजोमय (Sajjangad Mashal Festival) झाल्याचं चित्र होतं.

किल्ले सज्जनगडावर मशाल महोत्सव

परळी भागातील दुर्गनाद प्रतिष्ठानच्या मावळ्यांकडून 'एक मशाल शिवरायांच्या चरणी' या संकल्पनेतून आज, रविवार 12 नोव्हेंबर रोजी किल्ले सज्जनगडावर मशाल महोत्सवाचं आयोजन करण्यात आलं होतं.

शेकडो धगधगत्या मशाली सज्जनगडाकडं मार्गस्थ

यावेळी पहाटे 3.30 वाजता सज्जनगड (Sajjangad Fort) वाहनतळ इथं महाराजांना पालखीमध्ये स्थानापन्न करण्यात आलं. तसेच महाराजांचे औक्षण-ध्वज पूजन झाल्यानंतर शिवराय, शंभूराजे, समर्थ रामदास स्वामी, जय श्रीराम, हर महादेवच्या जयघोषाने किल्ले सज्जनगडकडं शेकडो धगधगत्या मशाली मार्गस्थ झाल्या. शिंग, तुतारी, हलगी पथक यांसारख्या वाद्यांचा ठेका अन् मावळ्यांचा उत्साह मोठ्या प्रमाणात पहायला मिळत होता.