Dhule News: धुळ्यात प्रवेश रस्त्यास 12 कोटींचा निधी मंजूर

Dhule News : शहरातील प्रकाश थिएटर परिसरातील नाल्यापासून तर पारोळा चौफुलीपर्यंतचा रस्ता विकसित व्हावा अशी अनेक दिवसांपासून मागणी होती. (12 crore sanctioned for access road dhule news)

त्याची दखल घेत माजी केंद्रीय मंत्री व खासदार डॉ. सुभाष भामरे, भाजपचे शहर-जिल्हाध्यक्ष अनुप अग्रवाल, माजी महापौर प्रदीप कर्पे यांनी घेतली. त्यांच्या अथक पाठपुराव्यामुळे राज्य शासनाने भरीव १२ कोटींचा निधी मंजूर केला आहे.

प्रकाश थिएटर परिसरातील नाल्यापासून तर पारोळा चौफुलीपर्यंतचा रस्ता अहोरात्र वर्दळीचा आहे. जळगावमार्गे धुळे शहरात प्रवेशाचा मुख्य मार्ग आणि शहरातील बाजारपेठेला जोडणारा हा मार्ग आहे. त्याचे नूतनीकरण व्हावे, अशी मागणी होती.

हेही वाचा : नेट बँकिंग खात्यात ठेवा कमी रक्कम...जाणून घ्या कारण

ते लक्षात घेत खासदार भामरे, श्री. अग्रवाल आणि महापौर असताना श्री. कर्पे यांनी शासनाशी पत्रव्यवहार सुरू केला. त्यांच्या पाठपुराव्याअंती शासनाने अर्थसंकल्पातून भरीव १२ कोटींचा निधी मंजूर केला.

याकामी मुख्यमंत्री एकनाथ शिंदे, उपमुख्यमंत्री देवेंद्र फडणवीस, सार्वजनिक बांधकाममंत्री रवींद्र चव्हाण, पालकमंत्री गिरीश महाजन, आमदार जयकुमार रावल, आमदार अमरिशभाई पटेल, माजी आमदार राजवर्धन कदमबांडे यांचे सहकार्य लाभले, असे श्री. कर्पे यांनी सांगितले. निविदा प्रक्रियेनंतर महिन्याने या रस्त्याचे काम सुरू होईल.