नगर : कोरोनामुळे एसटी महामंडळाला मोठा फटका बसला. त्यातून एसटीला बाहेर काढण्यासाठी सरकारने मालवाहतुकीस परवानगी दिली. एक जूनपासून जिल्ह्यात एसटीद्वारे मालवाहतूक सेवा सुरू झाली. आतापर्यंत 27 मालवाहतूक एसटीच्या साहाय्याने 100 फेऱ्या पूर्ण करून नगरने राज्यात आघाडी घेतली आहे. त्यातून नगर विभागाला साडेसात लाखांचे उत्पन्न मिळाले. 

कोरोनामुळे लॉकडाउन केल्याने एसटीच्या तोट्यात भर पडत गेली. एसटीला तोट्यातून बाहेर काढण्यासाठी राज्य सरकारने एसटी प्रशासनाला मालवाहतुकीची परवानगी दिली.

क्लिक करा ः एसटीला मिळेनात प्रवासी 

जिल्ह्यासह राज्यात 22 मेपासूनच एसटीची मालवाहतूक सेवा सुरू झाली असली, तरी नगर विभागात खऱ्या अर्थाने एक जूनपासून ही सेवा सुरू झाली. दापोली येथे तयार करण्यात आलेला पहिला मालवाहतूक ट्रक नगर विभागाला देण्यात आला. त्यानंतर हा मालवाहतूक ट्रक एक जूनला प्रथम नगर-पुणे असा धावला. 

हेही वाचा ः अतिक्रमणांनी ओढ-नाले केले गायब

एक जूनपासून आतापर्यंत जिल्ह्यातील 27 मालवाहतूक ट्रकच्या माध्यमातून 100 फेऱ्या पूर्ण करण्यात आल्या. त्यांनी 16 हजार 918 किलोमीटर प्रवास केला. त्यातून नगर विभागाला सात लाख 49 हजार 700 रुपयांचे उत्पन्न मिळवाले.

अवश्य वाचा ः बाप-लेकीवर तरसाचा हल्ला, दोघे गंभीर जखमी

जिल्ह्यातील 11 आगारांच्या माध्यमातून संपूर्ण तालुक्‍यातील मालवाहतुकीची नोंदणी करण्यात येत आहे. नोंदणी झाल्यानंतर शेतकऱ्यांच्या बांधावर जाऊन एसटीत माल भरला जात आहे. 

प्रवासी एसटी तोट्यातच 
राज्य सरकारने प्रवासी वाहतुकीस एसटीला परवानगी दिली असली, तरी प्रवाशांचा प्रतिसाद अत्यल्प आहे. त्यामुळे प्रवासी एसटीच्या फेऱ्या तोट्यात सुरू आहेत. 

जिल्ह्यातील 11 बसस्थानकांत नोंदणी कक्ष उभारले असून, नोंदणीनंतर तत्काळ मालवाहतूक ट्रक शेतकऱ्यांच्या बांधांवर जाऊन माल भरून तो राज्यातील बाजारपेठेत नेला जातो. 
- विजय गिते, विभागनियंत्रक, नगर