श्रीगोंदे : मराठा आरक्षणावरून (Maratha reservation) रण पेटायला सुरूवात झाली आहे. समाजाच्या तरूणांमध्ये मोठा असंतोष आहे. परंतु सध्या कोरोनाचा काळ असल्याने आंदोलन पुढे ढकलले जात आहे. सरकारविरोधात वातावरण तयार होऊ लागले आहे. या आंदोलनाला भाजपनेही ((BJP) बळ द्यायला सुरूवात केली आहे. श्रीगोंद्याचे आमदार बबनराव पाचपुते (babanrao pachpute) यांनी भारतीय जनता पक्षाचा प्रत्येक कार्यकर्ता सहभागी होईल, असं सांगितलं आहे. (BJP supports Maratha reservation movement)

मराठा आरक्षणासाठी कायदेशीर लढाईत महाविकास आघाडी सरकारने कच खाल्ली. आता आरक्षण मिळविण्यासाठी समाजाकडून जी आंदोलनात्मक पावले टाकली जातील, त्यात आम्ही आंदोलकांच्या खांद्याला खांदा लावून सहभागी होऊ, अशी ग्वाही आमदार बबनराव पाचपुते यांनी एका निवेदनाद्वारे दिली आहे.

पाचपुते म्हणाले, आरक्षण हा राज्यातील मराठा समाजाच्या विकासाचा व समाजातील तरुणांच्या भवितव्याचा मुद्दा असतानाही महाविकास आघाडी सरकारने कायदेशीर लढाईत कुचराई केली. फडणवीस सरकारने या मुद्द्यावर घटनात्मक कार्यवाही करून दिलेल्या आरक्षणाचादेखील आघाडी सरकारने मुडदा पाडला. त्यामुळे यापुढे आरक्षणासंदर्भात मराठा समाजाच्या नावाने व नेतृत्वात जी आंदोलने होतील त्यामध्ये भाजपा पक्षीय ओळख बाजूला ठेवून सहभागी होईल असे पक्षाचे प्रदेशाध्यक्ष चंद्रकांत पाटील (chandrakant patil) यांनी जाहीर केले आहे. त्यानुसार राज्यात होणाऱ्या आंदोलनांमध्ये भाजपचे कार्यकर्ते सहभागी होतील.

आरक्षणाचा मुद्दा निकाली निघेपर्यंत हा लढा सुरू ठेवण्याचा भाजपचा निर्धार आहे. मराठा समाजास आरक्षण देण्याची आघाडी सरकारची मानसिकताच नसल्याने आघाडी सरकारने मराठा समाजाची घोर फसवणूक केली आहे, हे सर्वोच्च न्यायालयाचे निकालपत्र वाचल्यावर उघड होते. ठाकरे सरकारने ही फसवणूक थांबवावी व समाजास न्याय मिळावा यासाठी सरकारला जागे करणे गरजेचे आहे. त्यासाठी होणाऱ्या प्रत्येक राज्यव्यापी आंदोलनांत भाजपचा सक्रीय सहभाग राहील, असे ते म्हणाले.

मागासवर्गीय आयोगाची मुदत संपूनही...

राज्यातील मागासवर्गीय आयोगाची मुदत संपल्यानंतर नवा आयोग स्थापन करण्यातही महाविकास आघाडी सरकार चालढकल करत आहे. त्यावरूनच आरक्षणाच्या प्रश्नावर सरकारची नकारात्मक मानसिकता स्पष्ट होत आहे, असा आरोपही पाचपुते यांनी केला आहे.

(BJP supports Maratha reservation movement)