शिर्डी : निळवंडे कालव्यांच्या कामाची गती कायम ठेवण्यासाठी यापूर्वी केलेल्या 105 कोटी रुपयांच्या तरतुदीत कोणतीही कपात करायची नाही, मजूर नसले तरी यंत्रांचा वापर करून काम सुरू ठेवायचे, गरज पडल्यास आणखी निधी द्यायचा, पुढील दोन वर्षांत हे काम पूर्ण करायचे, असा निर्णय आज मुंबईत झालेल्या बैठकीत घेण्यात आला. जलसंपदामंत्री जयंत पाटील, महसूलमंत्री बाळासाहेब थोरात व ऊर्जा राज्यमंत्री प्राजक्त तनपुरे यांच्या प्रमुख उपस्थितीत झालेल्या या बैठकीस उपस्थित असलेले आमदार आशुतोष काळे यांनी ही माहिती दिली. 

हेही वाचा - अरेरे दु: खत घटना श्रीगोंदे शेततळ्यात बुडून सख्या भावंडांचा मृत्यू 

बैठकीनंतर जयंत पाटील यांनी व्हिडिओ कॉन्फरन्सद्वारे आमदार किरण लहामटे व गोदावरी मराठवाडा विकास महामंडळाचे कार्यकारी संचालक एन. व्ही. शिंदे यांच्याशीही चर्चा केली. निळवंडे कालव्यांच्या कामासाठी राज्य सरकारने यापूर्वीच एकशे पाच कोटी रुपयांची तरतूद केली आहे. मात्र, कोरोना संकटामुळे जलसंपदाच्या सर्व प्रकल्पांच्या निधीत सत्तर टक्के कपात करण्यात आली. निळवंडेच्या निधीत मात्र कपात न करण्याचा निर्णय झाल्याचे सांगण्यात आले. 

जाणून घ्या - डॉ. शंकरप्रसाद गंधे याला बेड्या... गर्भपात केल्याचे कारण

निळवंडे कृतिसमितीचे पदाधिकारी प्रा. बाळासाहेब वर्पे यांनी सांगितले, की कालव्याच्या कामासाठी एकूण सुमारे अडीचशे कोटी रुपयांची गरज आहे. पुढील वर्षी उर्वरित रकमेची तरतूद झाली, तर जलसंपदामंत्र्यांनी सांगितल्याप्रमाणे येत्या दोन वर्षांत कालव्यांचे काम पूर्ण होऊन लाभक्षेत्रात पाणी येऊ शकेल. सुरवातीला कालव्याद्वारे पाणी आणून लाभक्षेत्रातील साठवणतलाव व बंधारे भरायचे व दरम्यानच्या काळात वितरिकांची कामे पूर्ण करायची, असे नियोजन आहे. 

आता पाणी येण्याची शक्‍यता : शेळके 
निळवंडे कृतिसमितीचे अध्यक्ष नानासाहेब शेळके यांनी सांगितले, की पुढील दोन वर्षांत निळवंडे कालव्यांची कामे पूर्ण करून लाभक्षेत्रात पाणी आणण्यासाठी जलसंपदामंत्री जयंत पाटील व महसूलमंत्री बाळासाहेब थोरात कटिबद्ध आहेत. ऊर्जा राज्यमंत्री प्राजक्त तनपुरे व आमदार आशुतोष काळे यांचेदेखील सहकार्य मिळते आहे. दुष्काळी टापूतील आमच्या तीन पिढ्या या पाण्याची वाट पाहून थकल्या. आता पाणी येण्याची शक्‍यता निर्माण झाली आहे.