अहमदनगर : माजी मंत्री राम शिंदे यांनी विधान परिषद निवडणुकीसाठी भाजपकडून उमेदवारी अर्ज आज गुरुवारी (ता.नऊ) दाखल केला. त्यांनी सोशल मीडियावरुन आमदार रोहित पवार (Rohit Pawar) यांचे नाव न घेता टीका केली आहे. शिंदे आपल्या पोस्टमध्ये लिहितात, की मी काल भाजपतर्फे विधान परिषदेसाठी अर्ज भरला. मी काल ( ८ जुनला ) भारतीय जनता पार्टीतर्फे विधान परिषदेसाठी फॉर्म भरला आहे. काल कर्जत-जामखेडमध्ये बहुतेक ठिकाणी पाऊस पडला. पावसाळा ( ७ जुननंतर ) सुरू झाला आहे. (Ram Shinde Criticize Rohit Pawar Over Kukadi Water Issue)

पण उन्हाळ्यामध्ये शेतकऱ्यांना कुकडीच्या आवर्तनाची गरज असताना पाणी सुटले नाही. परिणामी बरेच उभी पिके जळाली. फळबागाचे नुकसानही झाले. काही ठिकाणी बागा जळाल्या. पण काल असे समजले की कुकडीचे आवर्तन सुटणार आहे. मग याला काय समजावे. योगायोग, नियोजन की परिणाम? असे म्हणत राम शिंदे (Ram Shinde) यांनी अप्रत्यक्ष रोहित पवार यांची टीका केली.

कुकडीचे पाणी सोडावे यासाठी शिंदे यांनी आंदोलन केले होते. पण शेतीसाठी पाणी सोडलेच गेले नाही. मात्र बुधवारी भाजपकडून विधानपरिषदेसाठी त्यांनी उमेदवारी अर्ज भरला आणि कुकडीचे आवर्तन सुटणार आहे असे समजले, असे शिंदे आपल्या पोस्टमध्ये म्हणाले.